U-Arthur Zwane ukhathazwa AmaZulu aseyi-ATM
Umqeqeshi u-Arthur Zwane ukhala ngokuthi AmaZulu FC asephisana ngamaphuzu ngendlela exakile.
Uthi lokhu sekunciphise amathuba abo okuqeda emaqenjini amane aphezulu kwiBetway Premiership.
Usuthu lwehlulwe ngo 2-1 yiChippa United eBuffalo City Municipality Stadium ngoMgqibelo.
Lokhu bekuwukuhlulwa kwalo kwesithathu kulandelana emidlalweni yeligi.
Yize ehluliwe, AmaZulu asahlezi endaweni yesikhombisa kwilogi ngamaphuzu angu-30 emidlalweni engu-24.
U-Arthur Zwane uke waveza ukuthi uphokophele ukuthi AmaZulu aqede emaqenjini amanje aphezulu, kodwa manje usebona amathuba alokho eshabalala ngenxa yokulahla amaphuzu.
“Bekufanele siyishaye iChippa bese siqinisekisa indawo yethu emaqenjini ayisishiyagalombili aphezulu,” kusho uZwane.
“Emidlalweni yethu emine yokugcina, singenelwe amagoli afanayo. Manje sinengcindezi ngoba sinikeze iChippa ithuba lokusondela kithi.
“Uma singawunqobi umdlalo olandelayo, sizophuma emaqenjini ayisishiyagalombili aphezulu kwilogi.”
U-Arthur Zwane usola ukuthi AmaZulu adembesela emuva futhi enza amaphutha angalungile okuyiwo adicilela phansi iqembu.
Usuthu selushaye amagoli angu-27 kodwa lwangenelwa angu-32. Amaphutha onozinti nezitobha aya ngokukhula.
“Silokhu silinyazwa amaphutha ethu, siphisaba ngebhola kalula ngendlela exakile,” kwengeza yena.
“Leyo yindlela isizini yethu eme ngayo. Siphisana ngamagoli alula kuwo wonke la maqembu.”
Usuthu seluhlulwe emidlalweni engu-12 kwengu-24 yeligi oseluyidlalile, lwanqoba eyisishiyagalolunye kuphela.
Luzozama ukuvuka luzithathe uma seluesingethe iRichards Bay eKing Zwelithini Stadium ngoLwesihlanu ngo-7.30 ebusuku.
Womabili lamaqembu azikhotha amanxeba njengoba neRichards Bay ibuya endukwini ngempelasonto edlule.
