Seyidaluliwe imali ezotholwa elizodla eseligi
- Sibongiseni GUMBI
IPremier Soccer League (PSL) seyiqinisekise imali yomklomelo ezotholwa yiqembu elizodla isicoco seBetway Premiership ka-2024/25. Lesi simemezelo sinziwe ngoLwesithathu.
Usihlalo wePSL u-Irvin Khoza ubezocacisa ngoxhaso olusha lweminyaka eminingi lweligi neBetway, lwemali ebalelwa ku-R900 million.
UKhoza ubize umhlangano oyisipesheli nabezindaba ezokwenza lezi zimemezelo ngaphambi kokhetho lwehlandla lakhe elilandelayo njengosihlalo.
Uyena kuphela ozongenela umbango wesikhundla sokuba ngusihlalo wePSL, akekho omfakele inselelo.
Isimemezelo sakhe sokuqala kube wukuthi iqembu elizonqoba iBetway Premiership ka-2024/25 lizogoduka no-R20 million.
“Ikilabhu ezoqeda endaweni yokuqala, inqobe iBetway Premiership izothola u-R20 million,” kusho uKhoza.
Ayikho eminye imininingwane ekhishiwe ngokuthi amanye amaqembu – azoqeda kusuka endaweni yesibili kuya phansi – azohlomula kanjani.
“Lindani, emasontweni ambalwa ezayo, sizomemezela ukuhlukaniswa kwemiklomelo kusukela kozophuma isibili kuya le,” kwengeza uKhoza.
