Okuqinisa u-Arthur Zwane idolo ngoSuthu ‘oseluvuthiwe’
Umqeqeshi waMaZulu FC, u-Arthur Zwane ukholwa ukuthi iqembu lakhe selivuthiwe manje fthi lizoba kwamathathu azoqeda ephezulu kwilogi yeBetway Premiership.
Uthi ukube abazange balahle amaphuzu ngendlela engacacile emidlalweni embalwa edlule, ngabe kumanje Usuthu lusendaweni yesithathu.
Usuthu lwehlulwe kathathu kulandelana emidlalweni yeligi ngaphambi kokuthi lushaye iRichards Bay ngempelasonto edlule
Lugotshwe yiMamelodi Sundowns, laphindwa yiTS Galaxy neChippa United okwenze lwalahlekelwa amaphuzu abalulekile.
Manje luhlezi endaweni yesikhombisa kwilogi kodwa lusalele ngamaphuzu amanje nje kuphela kwiSekhukhune United esendaweni yesithathu.
Sekusele imidlalo emihlanu ngaphambi kokuphela kwesizini kanti u-Arthur Zwane ubona bengalukhava lolu khalo oluphambi kwabo.
UZwane usakholelwa ukuthi kungenzeka ukuqeda endaweni yesithathu.
Usenxuse abadlali bakhe ukuthi bawakhiphe wonke amangwevu emidlalweni yokugcina.
“Konke kusezandleni zethu. Konke kukithi njengamanje,” kusho uZwane.
“Uma sifuna ukudlala kwiConfederation Cup, kufanele siwine yonke imidlalo yethu esele.”
UZwane uthi isikwati anaso njengamanje eqenjini sikhombise ukuzinikela okuhle kule sizini.
Ukholwa ukuthi banakho okudingekayo ukuze bafinyelele kulesi sifiso abazibekele sona.
“Ngesikhathi siqala isizini, abantu bebesibona njengeqembu elingase ligawulwe yizembe,” kuchaza uZwane.
“Kodwa sibe namathuba amahlanu okufinyelela endaweni yesithathu. Ukube besiwathathile, ngabe sesikhona manje.”
UZwane, oke wacija iKazier Chiefs phambilini, uphinde waveza amathuba abawayeke emidlalweni edlule.
“Silahle amaphuzu ayisithupha abalulekile. Ukube siwaqoqile, lokho bekuzosibeka endaweni yesithathu.”
Nokho ukholwa ukuthi lokhu kubhacaza kube yithuba elihle lokufunga okuthile okubalulekile eqenjini lakhe.
“Abadlali bethu bayakhula. Izinto ezithile zenzeka ngesizathu esithile,” kuqhuba yena.
UZwane uyavuma ukuthi AmaZulu azigwaze ngowawo emidlalweni eminingi kakhulu kule sizini.
“Amaphutha ethu abe asilibazise kakhulu. Awekho amaqembu amaningi asishayile, kodwa besizinikela kuwo” kwengeza yena.
Lo mqeqeshi uthi ugqugquzelwe wumdlalo wakamuva bebhekene neRichards Bay ukubona ukukhanya phambili.
Uthi bawalungisile amanye amaphutha abo angaphambilini futhi manje ubona bezoyisonga ngegiya eliphezulu isizini.
- FUNDA NALA | OweMoneni Pirates ucacisa ‘eyokudayisela’ uMaMkhize
“Sesibheke ngabomvu umdlalo olandelayo. Angikhathazekile ngembangi. Leli qembu lingamelana noma yini.”
AmaZulu azobhekana neStellenbosch FC ngo-Ephreli 19 ekuhambeni eDanie Craven Stadium emdlalweni olandelayo.
