Liqoba liyavungula izembe kwiChippa, kudedelwe 18 wonke

I-Chippa United isiqinisekise izinguquko eqenjini elikhulu ngokudedelwa kwabadlali abangu-18, okuhlanganisa nomdlali wasesiswini onamava u-Andile Jali.

Leli qembu elizinze e-Eastern Cape lenze lesi simemezelo ngoLwesibili ntambama ezinkundleni zokuxhumana.

Lokhu kukhombisa isiqalo esisha ngaphansi komqeqeshi osanda kuqokwa uSinethemba Badela nomqondisi weqembu uSinesipho Mali.

UBadela ujoyine i-Chippa esuka ekubeni yiphini likaRulani Mokwena kwiWydad Athletic eMorocco, kanti uMali yena ubesebenza kwiBafana Bafana.

Phakathi kwabahambayo kukhona abebebolekisiwe o-Aphele Teto, uSiphelo Baloni, noSonwabile Khumalo.

Bobathathu laba bazibuyela emaqenjini abo njengoba kuphela isikhathi sokubolekiswa kwabo.

UTeto ubuyela kwiLivingston FC edlala kwiScottish Premier League lapho eseneminyaka emibili esele enkontilekeni yakhe.

UBaloni noKhumalo bona bazobuyela ezinkunzini zaseSoweto i-Orlando Pirates lapho benezinkontileka khona.

Ukuhamba kukaJali kuphawula ukuphela kwesikhashana ekwiChilli Boys, futhi akucaci noma usazoqhubeka yini nokudlala noma uzoliyeka ibhola. 

Ukuzamazama kweqembu kuza njengoba iChippa United ilungiselela isizini ezayo ngenhloso ecacile yokwakha kabusha.

“I-Chippa United iqinisekisa ukuhamba kwabadlali ngaphambi kwesizini ka-2025/26,” sifundeka kanje isitatimende sale kilabhu.

“Singaqinisekisa ukuhamba kwabadlali abambalwa njengoba izinkontileka zabo neqembu ziphela ekupheleni kwesizini ka-2024/25.”

• FUNDA NALA | Ingwazi yePirates iveza engakuzwa kahle ngohalelwa yileli qembu

Isizini iphela uma kusongwa uJuni, okusho ukuthi lezi zinkontileka ziphela ngomhla ka-30. 

Kodwa basheshe baziswa ukuthi bazokhululwa ukuze babe beqala befuna amaqembu amasha abazodlala kuwo. 

• SITHOLE NAKU-FACEBOOK | Lisenethini.co.za 

Abadlali abalandelayo ngeke babe yingxenye yeqembu eliya emkhankasweni omusha:

1. Darren Johnson
2. Lukhanyo July
3. Justice Chabalala
4. Samkelo Jali
5. Andile Jali
6. Baraka Majogoro
7. Athenkosi Dlala
8. Ronald Sanou
9. Craig Martin
10. Ronaldo Maarman
11. Thobani Jacobs
12. Sifiso Mazibuko
13. Aviwe Mqokozo
14. Enock Sakala
15. Bienvenu Eva Nga
16. Aphele Teto
17. Siphelo Baloni
18. Sonwabile Khumalo