Kuvela isizathu esenze ahoxa abefuna uMatuludi 

UThabang Matuludi ubengomunye wabadlali obekulindeleke ukuthi bashintshe amaqembu ngesikhathi sewindi lokudayiselana ngabadlali ngoJanuwari. 

Yena nozakwabo, u-Oswin Appolis bebengundabamlonyeni futhi bekulindeleke ukuthi basuke kwiPolokwane City.

I-Orlando Pirates, iKaizer Chiefs neStellenbosch FC kubikwa ukuthi bebebheke ukusayinisa uMatuludi ngoJanuwari.

Kodwa namanje usahleli kwiPolokwane City, futhi manje isizathu sangempela sokuthi kungani engahambanga sesivelile. 

IPhakaaathi ibika ukuthi ukusuka kwakhe kwiPolokwane City kuvinjwe ukulimala. 

UMatuludi, oneminyaka engu-26 ubudala, kubikwa ukuthi uklunyuke imisipha edolweni emdlalweni weBetway Premiership neSuperSport United ngoJanuwari 17. 

Kulindeleke ukuthi ahlale engadlali isikhathi eside, okusho ukuthi kungenzeka umnyakazo ube ube khona ngesizini ezayo.

“Ibhola linjalo, futhi ukulimala kuyingxenye yalo mdlalo,” kusho umthombo osondelene neqembu. 

“Ngeshwa lakhe, walimala ngesikhathi esibi, ngakho-ke yingakho kungenzekanga lutho.

“Ungumdlali onekhono, futhi nginesiqiniseko sokuthi amaqembu aseSoweto azobuya futhi kuye ngaphambi kwesizini ezayo. 

• OLUNYE UDABA: UMogashoa ungenelela olweholo likaSaleng, uveza amanga

“Okubalulekile ukuthi alulame ngemva kokuhlinzwa, bese ebuyela enkundleni ngokushesha okukhulu.”