Iyaphuma ‘emasisweni’ iRichards Bay, ibuyela ekhaya
I-Richards Bay FC isizobuyela ekhaya layo langempela ngesizini ezayo kulandela iminyaka isekusisweni.
Usihlalo wekihlabhu uSifiso “Jomo” Biyela uqinisekise lezi zindaba kulandela umdlalo wabo wokugcina wasekhaya wesizini ka-2024/25.
Iqembu lizobuyela eMhlathuze Sports Complex eRichards Bay ngemuva kwamasizini amane lidlala imidlalo yalo yasekhaya ‘ekusisweni’ eThekwini.
I-Richards Bay yagcina ukudlala kule nkundla ngo-Agasti ka-2021. Yavalwa yiPSL ukusebenzisa le nkundla, ikhala ngokungabi sesimweni sayo.
Ukukhathazeka kwePSL kwakuhlanganisa izindlu zangasese ezingasebenzi, usilingi owonakele, izicisha-mlilo ezingekho esimweni, nezintambo zikagesi ezihamba eduze kwamanzi amile.
Le nkundla kwathiwa ayiphephile ngemuva kokuhlolwa kwe-PSL okwakuholwa yisikhulu esibhekelele ukusebenza, uRonnie Schloss.
Kusukela lapho, leli qembu kudingeke ukuthi lidlale imidlalo yalo yasekhaya ebangeni elingamakhilomitha acela ku-200 ukusuka eRichards Bay.
Beyidlalela eKing Zwelithini Stadium eThekwini. Ngaphandle kwale nselelo, iqembu likwazile ukunyukela esigabeni esiphezulu ngo-2022.
Ngesizini yokuqala kwiBetway Premiership, iqede endaweni ka-13 neka-15 ngedlule, yasinda seyidlala imidlalo yokuhlunga.
Manje, njengoba sekusele umdlalo owodwa kule sizini, ihlezi endaweni ka-11 ngamaphuzu angu-30 emidlalweni engama-27 – iphephile ezembeni.
Ukudlala kwayo ngo 0-0 neGolden Arrows ngoMgqibelo kungenzeka kube wumdlalo wayo wokugcina wasekhaya eThekwini.
Ngemuva komdlalo uBiyela ukhulume nabalandeli wamemezela ukuthi bazobuyela enkundleni yabo yangempela.
“Lena yisizini yethu yesine sidlala eThekwini,” kusho uBiyela. “Asisazi nokuthi i-Richards Bay isibukeka kanjani manje.
“Kodwa ngesizini ezayo sizobe sidlalela ekhaya,” kuthembisa uBiyela ihlombe kubalandeli.
UBiyela uphinde wancoma ithimba labaqeqeshi nabadlali asebemnkantshubomvu ngokusebenz akahle nabadlali abasebancane ngesizini ebinzima.
Kulo sizini, ikilabhu yenze izinguquko kwezokuqeqesha ngemuva kokusula kukaBrandon Truter ngoNovemba.
Ithimba labaqeqeshi elithathe izintambo belihlanganise uSibusiso Msomi, uSboniso Gumede, uRonnie Gabriel, bajoyinwa uPapi Zothwane ngokuhamba kwesikhathi.
IRichards Bay izovala isizini yayo ekuhambeni la izobhekana khona neSuperSport United ePeter Mokaba Stadium Meyi 24.
Ukubuyela eMhlathuze kuphawula isahluko esisha kuleli qembu nabalandeli balo abaqotho okungeke kusadingeka ukuthi bakhiphe imali eyengeziwe ukuze babukele iqembu labo.
