IRoyal AM nelinye ihlazo elibi kwiPSL
IPremier Soccer League isizithole ingena kwelinye ihlazi futhi mayelana nezingqinamba zeRoyal AM.
Leli qembu elizinze eMgungundlovu lisenkingeni njengoba abakwaSars sebeyifake ngaphansi komqaphi wezimali.
Lokhu kungenxa yesamba sentela okukholakala ukuthi silinganiselwa ku-R40 million esikweletwa umengameli weqembu uShauwn Mkhize.
Ikilabhu yafakwa ngaphansi komqaphi wezimali ngoDisemba, futhi abadlali nabanye abasebenzi abazange bahole.
Abadlali bateleka, kwaphoqa ukuthi iPSL ihoxise umdlalo wayo obuhleliwe weBetway Premiership neChippa United.
Futhi manje iPSL isiphinde yaphoqeleka ukuthi iyimise yonke imidlalo yeRoyal AM kuze kube kulungiswa izinkinga.
NgoLwesithathu ntambama, iPSL ikhiphe isitatimende ngalolu daba, icacisa ngokwenzekayo. Isitatimende sifundeka kanje:
“1. NgoJanuwari 9 ku-2025 iRoyal AM FC yazisa iPSL ukuthi ngeke ikwazi ukuhlangabezana nezibopho zayo maqondana nomdlalo wayo neChippa United FC ngoJanuwari 11 Januwari ka-2025 ngenxa yobunzima obubangelwa wukuqokwa komqaphi zimali.
“2. I-Executive Committee (ExCo) seyibe nemihlangano emithathu ehlukene ifuna isiqinisekiso sokuthi ikilabhu, ngaphansi komqaphi zimali, izokwazi ukuhlangabezana nezibopho zayo zemidlalo ngendlela efanele.
“3. NgoJanuwari 17 ka-2025 i-ExCo yaziswa ukuthi incwadi yesiqinisekiso (evela kubaphathi beqembu nomqaphi zimali) izohlinzekwa iqinisekisa ukuthi izinkinga eziholele ekutheni ikilabhu ingakwazi ukuhlangabezana nezibopho zayo sezixazululiwe.
“4. Ayikho incwadi enjalo esifikile futhi i-ExCo isale ingenayo enye indlela ngaphandle kokumisa umdlalo oyi-PSL Fixture 106 – Royal AM vs Orlando Pirates eHarry Gwala Stadium ngo-7.30pm– kanye nokumisa yonke eminye imidlalo yeRoyal AM (Betway Premiership neNedbank Cup) kuze kube yilapho kuvela okusha.
“5. I-Exco izophinde ihlangane ngoLwesihlanu kaJanuwari 24 ka-2025 ngo-11 ekuseni ukuze iRoyal AM (ngaphansi komqaphi zimali) yenze izethulo mayelana nalolu daba.”
IRoyal AM ibizodlala nePirates ngoLwesine koweligi, bese ibhekana neMilford FC ngoMsombuluko kwiNedbank Cup.
