IChiefs ilobizela oweBucs nobefunwa uthuli yiSundowns

• Sibongiseni GUMBI

IKaizer Chiefs inezinhlelo eziqinile zokubuyela emakethe ngoJanuwari iyohlwaya abadlali ezoqinisa ngabo ngokomyalelo womqeqeshi uNasreddine Nabi. 

Kubikwa ukuthi phezulu ohlwini lwabadlali abafunwa yiChiefs ngoJanuwari kukhona umgadli osemabhukwini e-Orlando Pirates njengamanje.

Kukhona nomdlali wasesiswini waseTanzania obekade elokhu elandelwa yiMamelodi Sundowns ngenhloso yokumthenga. 

Ngokubika kweKickOff, iChiefs izimisele ukuyolinga omakhelwane bayo iPirates ngomgadli ongakasetshenziswa kule sizini, uZakhele Lepasa.

Kuthiwa uNabi ubona lo mgadli ewuhlobo aludingayo njengoba evele esekusho kaningi ukuthi usashoda ngoyedwa noma ababili kubagadli. 

“IChiefs njengamanje isezinhlelweni zokuhlasela i-Orlando Pirates iyofuna umgadli uZakhele Lepasa kuyo,” kucashunwe umthombo usho kanje. 

Akucaci ke noma iPirates izovuma yini naye njengoba yenqabile kwiSuperSport United ngaphambi kokuqala kwesizini.

Kuvela ukuthi yabika ukuthi iyamdinga njengoba izoba nemidlalo eminingi kule sizini ngokwezinhlelo zayo. 

Omunye umdlali okuthiwa usohlwini lwabafunwa yiChiefs, uFaisal Salum waseTanzania okuvela ukuthi ubefunwa yiSundowns phambilini.

Yena kubikwa ukuthi uphakanyiswe yiphini lomqeqeshi elisha, uCedric Kaze oke wasebenza naye phambilini eTanzania.  

“Kuzoba nezinye izinguquko kubadlali kwiChiefs ngoJanuwari,” kucashunwe umthombo usho kanje kwiSoccerLaduuma.

“Uyamazi lo mdlali waseTanzania obelokhu ecathanyelwa yiMamelodi Sundowns, uFaisal Salum? 

“IKaizer (Chiefs) seyiyamfuna nayo. Empeleni nje yiphini lomqeqeshi uCedric Kaze elifike laphakamisa igama lakhe.

“Bobabili benoNabi bayamazi ngezikhathi zabo kwiYanga. Wayedlala kubo ngaphambi kokuyojoyina i-Azam kanti uKaze ubona enendawo emdingayo eqenjini leChiefs.

• OLUNYE UDABA: Iphinde yenze njalo iSundowns, yabuyela endaweni yayo

“Sekusele kwiChiefs ke manje ukuthi uma seyikulungele, iye kwi-Azam iyoqala izingxoxo.”