I-PSL nesimemezelo esishaqisayo ngendebe yeChampionship

IPremier Soccer League (PSL) isikuqinisekisile ukuthi alikho iqembu elizonikwa indebe yokunqoba iMotsepe Foundation Championship kule mpelasonto.

Lokhu kuzokwenzeka yize kulideleke ukuthi iqembu laseThekiwni, iDurban City, liqede liphezulu kulesi sigaba.

Inkinga wukuthi kusenecala elisazoqulwa elibandakanya iDurban City neJDR Stars.

Njengoba kubikiwe yi-iDiski Times, kuleli sonto, iDurban City ibandakanyeka ecaleni lokudlalisa umdlali ongabhalisiwe ngokufanele kweminye yemidlalo yayo.

Umphumela waleli cala ungase ujike izinto, kungabi yiDurban City eqeda iqhwakele kulesi sigaba.

Umphumela waleli cala kulindeleke ukuthi uphume ngoLwesibili, kaMeyi 20, ngemuva komzuliswano wokugcina wemidlalo yesizini.

Ngenxa yomthelela ongase ube khona ekumeni kwamaqembu kwiligi ngenxa yaleli cala, i-PSL iwuhlehlisile umcimbi wokunikezela ngendebe.

Ngokwesiko, indebe yeMotsepe Foundation Championship inikezwa iqembu eliqede liqhwakele ngemuva komdlalo wokugcina wesizini.

Nokho kulo nyaka leli cala elivuke kamuva liphoqe uphiko ukuthi kubambezeleke ukudluliselwa kwendebe kompetha.

“Kunezinto ezithile okusamele ziphothulwe namaqembu,” siufundeka kanje isitatimende esivela kwi-PSL.

“Akukacaci ukuthi lezi zindaba zingathinta kanjani ukuma kokugcina kwamaqembu kulesi sigaba.”

Lolu phiko lugcizelele ukuthi uma kuphela la macala esephothuliwe lapho umpetha ezothweswa khona umqhele ngokusemthethweni.

Isitatimende siqhubekile: “I-PSL inqume ukubambezela ukunikezelwa kwendebe ngenkathi lezi zindaba zisadingidwa.”

I-PSL yengeze ngokuthi izokwenza yonke imizamo yokuxazulula amacala ngokushesha okukhulu.

Iphinde yaqinisekisa ukuthi wonke amailabhu angamalungu azokwaziswa ngezinqumo uma seziphumile.

Njengamanje iDurban City yona ezihola phambili kwiMotsepe Foundation Championship, kodwa indawo yayo ingashintsha ngemuva kwesinqumo.

• FUNDA NALA | URicardo Katza eyokuvusa iCeltic ngeSuperSport

I-JDR Stars, ethintekayo kulesi sikhalo, ingahlomula uma icala livuna yona.

• SIBAMBE NAKU-FACEBOOK | Lisenethini.co.za

Lokhu kusho ukuthi umjaho wesicoco kungenzeka ungapheli yize imidlalo yokugcina izodlalwa kule mpelasonto.