Ezintsha ngokushiya kukaRibeiro ikhempu yeDowns
Ukushiya isigubhukane ekhempini kwesihlabani seMamelodi Sundowns, uLucas Ribeiro sekuubule ukuqagela okukhulu ngekusasa lalo mdlali.
Lo mgadli odabuka eBrazil, oqokelwe kumlomelo weFootballer of the Year, ushiye kungazelelwe esikhungweni iRoyal Marang ngoMgqibelo.
Lesi sikhungo esiseRustenburg yilapho iMamelodi Sundowns izinze khona njengoba izilungiselela isizini entsha.
I-FARPost ibika ukuthi isizathu sokushiya kukaLucas Ribeiro ekhempini ngaphambi kwabanye abadlali ukuthi izingxoxo zokudayiswa kwakhe sezisezingeni eliphezulu.
Lo mdlali oneminyaka engu-26 ubudala, owafika eNingizimu Afrika ngoJuni ka-2023, ube yikhongco elibalulekile ekunqobeni isicoco seligi okwesishiyagalombili kulandelana ngesizini edlule.
Umgqigqo wakhe omangalisayo umenze waba nesandla emagolini angu-25 emidlalweni engu-51 kuyo yonke imiqhudelwano.
ULucas Ribeiro uphinde wavelela kwiFifa Club World Cup ngegoli elihle alishaya bebhekene neBorussia Dortmund.
Leli goli belilihle kangangoba livotelwe laba yiGoal of the Tournament. Ubukhali abukhombise kulo mqhudelwano kumhehele intshisekelo yamaqembu aphesheya.
Manje, njengoba iMamelodi Sundowns isemalungiselelweni esizini entsha, ukuhamba kukaLucas Ribeiro kungazelelwe kwenza kungabazeke ukuthi uzoba khona yini emdlalweni wayo ngempelasonto.
ISundowns izoqala umkhankaso wayo weMTN8 ibhekene neRichards Bay eLucas Moripe Stadium – umdlalo uqala ngo-6 ebusuku.
Ukumvumela kweSundowns ukuthi ashiye ikhempu yeqembu kuwuphawu olukhomba ukuthi isikulungele ukumdedela ahambe.
Yize kukhona amakilabhu aseQatar, eFrance, naseBelgium, yikilabhu yangakubo, iFluminense, okuvela ukuthi ihamba phambili emjahweni wokumsayina.
IFluminense ibomvu yimali njengoba isanda kudayisa isihlabani sayo esidabuka eColombia uJhon Arias ngemali ebalelwa ku-R350 million.
U-Arias ngomunye wabadlali abavelele kwiClub World Cup kanti ngemali adayiswe ngayo, iFluminense ingakwazi ukuthenga uRibeiro.
WINA! GCWALISA IFOMU NGEZANSI UZIWINELE IJEZI LEQEMBU LAKHO
