USiphiwe Tshabalala ungene ohlwelweni olukhethekile lweFifa
Ingwazi yebhola laseNingizimu Afrika uSiphiwe “Shabba” Tshabalala uqokelwe ohlelweni lokuqala ngqa lwe-Fifa Players Executive Programme.
Lezi zindaba ziqinisekiswe encwadini ayibhalelwe ngumengameli weFifa uGianni Infantino.
Lo mengamelo we-Fifa uhalalisele uSiphiwe Tshabalala wathi ukubheke ngabomvu ukuzwa imibono yakhe ngekusasa lebhola.
USiphiwe Tshabalala ube esethula lezi zindaba ezinhle ezinkundleni zokuxhumana.
“Ngikubheke ngabomvu ukuhlanganyela phlelweni oluphezulu lwabadlali. Ngingumfundi weFifa,” kubhala yena.
Le ngwazi eneminyaka engu-40 yaduma emhlabeni wonke ngo-2010.
Washaya igoli lokuqala leNdebe yoMhlaba yeFifa eyayiseNingizimu Afrika.
Ishodi alidedela ngonyawo lwesokunxele bebhekene neMexico lisakhunjulwa namanje emhlabeni jikelele.
Yize iBafana Bafana ingazange ifinyelele esigabeni somkhumulajezi, igoli likaTshabalala lisabatshazwa namanje.
INingizimu Afrika yaba yizwe lokuqala elisingethe lo mqhudelwano elingaqhubekelanga esigabeni somkhumulajezi, kamuva yajoyinwa yiQatar ngo-2022.
USiphiwe Tshabalala ubenomsebenzi oncomekayo ebholeni lamazwe ngamazwe.
Udlale imidlalo engu-89 kwiBafana Bafana futhi washaya amagoli angu-12.
Waqokwa waba nguMdlali ovelele ngaphansi kweSafa ngo-2010.
Ezingeni lamakilabhu, ubeyisihlabani seKaizer Chiefs. Uwine umklomelo woMdlali oVelele kuleli qembu amahlandla amathathu.
Uphakamise izindebe eziningi, okuhlanganisa:
- Izicoco ezimbili zeligi (ngesizini ka-2012/13, neka-2014/15)
- Izindebe ezintathu ze-Telkom Knockout (ngo-2007, 2010, nango-2011)
- Izicoco ezimbili ze-MTN8 (ngo-2008, nango-2014)
- EseNedbank Cup esisodwa (ngo-2013)
UTshabalala uphinde abe nerekhodi elikhethekile kwidabhi yaseSoweto.
Udlale imidlalo eminingi yedabhi kwiChiefs (31) bedlala ne-Orlando Pirates kusukela kwaqala iPSL ngo-1996, washaya amagoli amane.
Idabhi yakhe yokuqala wayidlala ngo-2007 ibambana ngo 2-2. Manje, uTshabalala uthatha ulwazi lwakhe aluyise esigabeni somhlaba.
Njengengxenye yohlelo olusha lwe-Fifa, uSiphiwe Tshabalala uzosiza ekulolongeni ikusasa lebhola lezinyawo — ngaphakathi nangaphandle kwenkundla.
