Umgidi iSuperSport United ivika izembe sekukubi
Ubungafunga ukuthi iqeda kunqoba indebe enkulu i-SuperSport United ngeoLwesine emini indlela obekubhiyozwa ngakhona.
Kodwa lo mbhiyozo obuseLucas Moripe Stadium bekungewona owokujabulela indebe, bekungowokusinda ezembeni.
I-SuperSport United isinde ogibeni lokuyodlala imidlalo yokuhlunga ngkuthi ibambane ngo 1-1 neGolden Arrows.
Bekungewona ke umdlalo ojwayelekile lona njengoba kudlalwe imizuzu engu-45 kuphela.
Wakukade umisizwe ngenyanga edlule kulandela ukucima kwezibani kuyo le nkundla.
Wamiswa ngesikhathi sekhefu, wonabili amaqembu enegoli ngalinye – kwabe sekuqhutshekwa lapho ngoLwesine.
Ekhuluma ngemuva komdlalo, umqeqeshi u-Andre Arendse uveze ukuthi yize adlala ezingeni eliphezulu, ubeqala ukuzwa ingcindezi engaka.
“Kube yimizuzu engu-45 emide kunayo yonke empilweni yami,” kusho u-Arendse ngemuva komdlalo.
“Kunomlando omude ohambisana nake lilabhu. Uma ngikhuluma ngomdlalo, bekungeyona indlela esidlala ngayo leya.
“Kodwa isimo besiphoqa ukuthi senze izinto esingazijwayele ngoba bekumele siqinisekise ukuthi siba kulesi simo esikuso manje.”
Le nsizwa, eyayingunozinti owavimba kwiBafana Bafana eNdebeni yoMhlaba, ithe le ngcindezi yangoLwesine ibiyiqala.
“Bekuyinselelo enkulu. Bengikhuluma nethimba lami ekuseni namuhla ngithi eminyakeni engu-30 ngisebholeni ngizwa omizwa ehlukene, lona bewuhluke kakhulu.
“Yilento obekumele yisikhombise – ukuzinikela. Yilokho esikwenzile namuhla, ngiyabancoma abadlali ngalokho.”
Ngempelasonto edlule, iSuperSport United ibingalivika izembe ngokuthi ishaye iRichards Bay, kodwa yagcina ihlulekile, umdlalo waphela ngo 1-1.
U-Arendse uthi indlela abadlale ngayo kulowo mdlalo yamdumaza futhi ubengakaze alibone leli qembu lakhe lifathuza kanjeya phambilini.
“Kuyo yonke imidlalo esiyidlalile, engingawubalula ngithi besingekho ezingeni elifanele kuwo yilowo weRichards Bay.
“Asizange nje sibe semdlalweni kuwona. Kweminye besilahlwa yinhlanhla kodwa okuhle wukuthi sesikwenzile obekufanele.”
ISuperSport United iqede endaweni ka-14, kanti ingaphezu kweCape Town City ngenxa yamagoli kuphela.
Lokhu kusho ukuthi iCape Town City yiyo ezoyodlala imidlalo yokuhlunga la izobhekana khona namaqembu aqhamuka kwiMotsepe Foundation Championship.
Okwamanje akukacaci kahle ukuthi kuzoba yimaphi lawo maqembu ngenxa yecala leCape Town Spurs elingakaxazululwa.
