Sezigawulwe zabekwa koweStellies noSuthu
Kucacile ukuthi akuzuncengwana emdlalweni weMTN8 ophakathi kweStellenbosch FC naMaZulu FC eCape Town Stadium ngeSonto ntambama.
Lona ngumdlalo wesithathu emzuliswaneni wokuqala kulo mqhudelwano wokuvula isizini kanti kulindeleke nawo ushise njengemibili yokuqala.
NgoMgqibelo kudlalwe emibili kanti kuyo kube namagoli ayisikhombisa futhi awukho kuyo oye esikhathini esengeziwe.
I-Orlando Pirates isheshe yaqeda ngePolokwane City ishaya amagoli amabili esiwombeni sokuqala nokuyiwo egcine inqobe ngawo lo mdlalo obuse-Orlando Stadium ebigcwele phama.
Kuthe ebusuku ngawo uMgqibelo, iSekhukhune yakhombisa ukuthi ubengadlali ukaputeni wayo uLinda Mntambo uma ethi abasafuni ukuba yiqembu elingomvakwezinye.
Uthe kule sizini ufuna kucace ukuthi iSekhukhune seyikhulile, seyiyiqembu elilwela zonke izicoco edlala kuzo, ayiphelezeli nje amanye.
Manje ke amehlo asejikele kwiStellies noSuthu ukuthi bona bazobaphakelani abalandeli osekunesikhashana belambele ibhola lakuleli.
USteve Barker weStellies ubophele iqembu eliqinile njengoba ebuyise abadlali abevele edlala ngabo nangesizini edlule.
Uyedwa kuphela oqala ukudlala, okungumdlali waseNigeria uGosdwill Enyinnaya odlala emuva kwesokudla.
Indawo kaFawaaz Basadien, oshiye leli qembu wajoyina iMamelodi Sundowns yona ithathwe ngu-Omega Mdaka obevele ekhona nagesizini edlule.
Lo mdlali wasemuva kwesokunxele ubudlala kuphela uma uBasadien engekho eqenjini njengoba le ndawo ubeseyenze eyakhe.
- Stellies: Stephens – Enyinnaya, Mdaka, Moloisane, Mcaba – Titus, Barns, Palace, De Jongh, Cupido
- Ebhentshini: Langeveldt, Sushi, Nkwali, Andrieas, Butsaka, Lekoloane, Phili, Mojela, Nku
- AmaZulu: Ofori – Hanamub, Allan, Mthethwa, FIelies – Hadebe, Ekstein, Zungu, Hlangabeza – Moon, Mashigo
- Ebhentshini: Mzimela – Mzobe, Dube, Ngcobo, Motswari, Mbanjwa, Soithole, Thabede, Mhlongo.
WINA! GCWALISA IFOMU NGEZANSI UZIWINELE IJEZI LEQEMBU LAKHO
