Owakhutshwa wutshwala uxwayisa uSipho Mbule
USipho Mbule usethole iseluleko esivela komunye owayengumdlali othembisayo, kodwa waphelela ezeni ngenxa yokuhluleka ukuziphatha.
UMichael Nkambule uzwakale ekhathazeke kakhulu ngokuthi uSipho Mbule ubukeka ekhubeka la abaningi abaphambi kwakhe abakhubeke khona.
UMbule usolwa ngokweqisa ezinkambeni okwenza abuye akhohlwe wuukuthi ungumdlali webhola – angayi ejimini noma afike engekho esimweni esifanele.
UMichael Nkambule naye wayebhekwe ukuthi aye kude ngebhola, kodwa wagcina ekhutshwe yibo utshwala.
Uveze ukukhathazeka kwakhe ekhuluma kwenye yamaPodcast muva nje, wathi ufisa uMbule ajike kule ndlela aseyithathile ngoba ayiyisani ndawo.
“Uma sikhuluma iqiniso nje, lento kaSipho Mbule ingizwisa ubuhlungu kakhulu mina,” kusho uMichael Nkambule.
“Into ebuhlungu kakhulu wukuthi uma ubheka uMbule umdlali onethalente eliphezulu kakhulu.
WINA | ILisenethini nethuba lokuwina ijezi
“Ungumdlali okumele ngabe udlala kwiBafana Bafana, kumele ngabe uya phesheya e-Europe.
“Futhi njengamanje usesikhathi somsebenzi wakhe la kumele ngabe usebenza kakhulu…
“Ngicabanga ukuthi uneminyaka engu-26 noma 27… kukula ngab wenza khona kakhulu imali.
“Kodwa manje usaphazanyiswa yizinto ezenzeka ngaphandle kwenkundla,” kuqhuba uNkambule.
“Okubuhlungu kakhulu ngale ndlela aziphethe ngayo wukuthi ngeke iphele kahle, ngeke kugcine yena.
“Ekugcineni alikho iqembu elizofuna ukumsayina. Yena manje kumele azame ukushintsha.
“Uma engashintshi uzophelela ezeni. Abantu bafaka imali ebhekile manje ebholeni.
“Akekho ongavuma ukukunika u-R200 000 ekubeni enganasiqiniseko ukuthi kusasa uzofika yini noma uzonyamalala.”
Uqhube wathi okuphoxa kakhulu wukuthi lesi simo angene kuso uMbule uke wasibona phambilini sigaxelisa abanye abadlali.
“Ngisho kwamina ngingenile kulesi simo sokuthi uzithole sewuthanda ubumnandi kakhulu.
“Into esengiyibonile ngathi wukuthi uma sike sabamba imali ngesandla, sibona ubumnandi namantombazane kubaluleke kunayo yonke into.
“Uma ngikhumbula kahle, ngisadlala eqenjini lesizwe lika-Under 17 bengiqeqeshwa uSerame Letsoaka.
“Wangitshela into eyodwa ebalulekile. Wathi, ‘Lalela, ibhola lidinga ukuthi uinikele nje iminyaka engu-10 je kuphela’.
“Ngemuva kwaleyo minyaka engu-10, usungahamba ke uyozizwisa ngalobo bumnandi ke.”
Uvumile ukuthi lawo mazwi angena ngapha, aphuma ngale ngaleso sikhathi kodwa usawakhumbula namanje.
“Uma bekutshela awuzwa ngoba izinto zisenzeka, imali isangena. Ngesikhathi imali ingasangeni, kuqala izinkinga ke.”
UMichael Nkambule uqhube wathi lesi simo asezifake kuso uSipho Mbule sizokwenza amaqembu adlale ngaye.
Uthi asezomsayina ambekele imibandela evuna wona wodwa ngoba useyaziwa ukuthi akathembekile emsebenzini wakhe.
Nokho uthe okuhle wukuthi uMbule usenesikhathi sokuthi ashintshe, ajike impilo yakhe agxile ebholeni ngoba usemncane.
