I-Arrows seyixolisile ‘ngokuhlambalaza’ uSipho Mbule
IGolden Arrows isheshe yasisusa isithombe ebesihambisana nombhalo ochukuluza uSipho Mbule ebiwufake ezinkundleni zokuxhumana ngoLwesibili.
Lokhu beyikwenze ngemuva kokuthi iPirates imemezele ukuthi inkundla yayo yasekhaya seyethiwe kabusha njengoba seyizoba yi-Orlando Amstel Arena.
I-Arrows ibe seyifaka isithombe somuntu olunguze emoyweni yathi nguSipho Mbule owenze kanjalo ngesikhathi edlula e-Orlando Stadium.
Okuhlubule abantu umoya wukuthi basebenzise uMbule ngoba bazi ukuthi unomlando wokuzithandela amankwebevu.
Bebemdelelela ngokuthi njengoba inkundla seyiqanjwe ngengama lotshwala kuzomjabulisa kakhulu uMbule.
Nokho ibuye yakubona ukuthi kube wukugagamela, yabe seyikususa lokhu ebikuphostile nokho abaningi bese bekubonile.
Omunye umlandeli, okukholakala ukuthi ngoweMamelodi Sundowns, ube eseyisola kakhulu ngalokhu athe akulifanele iqemb elisezingeni layo.
Lo mlandeli ozibiza ngoMnotho kwi-X ufake lw-tweet ye-Arrows wabe esethi: “Yikhasi le-Arrows elisemthethweni. Lo mahalo ucishiwe.
“Yiwo lo mbhedo ophuma ekhasini elisemthethweni leqembu lePSL.”
I-Arrows ibe seyiphendula ixolisa ngalokhu, yasho ukuthi iliboile iphutha layo yingakho isheshe yakucisha lokhu.
Abanye ke nokho bayesekile kulokhu ekushilo, bethi amancoko nje angasho lutho futhi ayinto ejwayelekile ebholeni.
Baze bavusa isigameko la iPirates nayo yadelela khona iKaizer Chiefs ngaphambi kokuqala kwesizini nangesikhathi seyixoshe umqeqeshi uNasreddine Nabi.
FUNDA NALA | UHunt ufuna ukusoconga iChiefs kwiNedbank Cup
Kukhona nabebethi kwayena uMbule wadelela amanye amakilabhu ngesikhathi ewabiza ngolamthuthu.
Nokho abanye bathe amancoko alolu hlobo afanale abalandeli, hhayi amakilabhu asesigabeni esikhokhelayo okufanele akhombisane inhlonipho.
Buka nakhu okubhalwe yi-Arrows nemendulo kaMnotho ngezansi;
