Ezintsha ngekusasa likaZitha Kwinika kwiKaizer Chiefs 

Umdlali wasemuva weKaizer Chiefs, uZitha Kwinika, usesayine ngokusemthethweni inkontileka yonyaka owodwa.

Lokhu sekuqede amasonto amaningi okuqagela ngekusasa lalo mdlali kuleli qembu elizinze eNaturena.

Njengoba inkontileka yakhe yokuqala beyiphelile ekupheleni kwesizini ka-2024/25, uZitha Kwinika ubebukeka ezoshiya kwiKaizer Chiefs. 

Kuke kwanesikhathi la ebebonakala engasenayo indawo eqenjini likaNasreddine Nabi. 

Kodwa ke njengoba ibhola ligingqika, nezinto zalo zishintsha ngokushesha kwesinye isikhathi.

Ukulimala kukaRushwin Dortley nokumiswa kukaMiguel Inacio kuphoqe uNabi ukuthi amsebenzise lo mdlali wasemuva onamava. 

Futhi uKwinika akazange alidedele leli thuba alithole ngenhlanhla.

Lo mdlali obengukaputeni weStellenbosch FC phambilini, ungene kahle eqenjini wafike wakhombisa ubuholi nokuzola. 

Udlale indima ebalulekile ngesikhathi Amakhosi eqeda isomiso sezindebe seminyaka engu-10 ngokunqoba iNedbank Cup.

Uphinde waqala futhi waqeda imidlalo emine kwemihlanu yokugcina yeligi. 

Izinto ziphinde zamvuna ngesikhathi iqembu lidedela omunye umdlali wasemuva onamava, u-Edmilson Dove.

Lo mdlali waseMozambique ubedlale imidlalo eminingi kunoKwinika ngesizini edlule kuMakhosi. 

• FUNDA NALA | USukazi uphawula ngamahlebezi ‘okudayisa’ iTS Galaxy

Ngokubika kweSABC Sport, uKwinika, oneminyaka engu-31 ubudala, uvele uhambe neqembu ukuya eNetherlands la lizilungiselela khona isizini entsha.

Njengoba iKaizer Chiefs iqinisile ezinhlangothini emuva, isamdinga umdlali wasemuva maphakathi nenkundla okunika uZitha Kwinika ithuba elihle lokuqinisa indawo yakhe.

• SIJOYINE KU-FACEBOOK | Lisenethini.co.za 

Wengezelwe unyaka owodwa omnika ithuba lokuthi azibonakalise ukuthi ukufanele ukugcina ehlale kuleli qembu mhlawumbe aze awabeke ethala amakhokho. 

• WINA! Gcwalisa imininingwane yakho ngezansi uzibeke ethubeni lokuwina ijezi elisha leqembu lakho