Ichithiwe iChiefs kwebimfuna eTanzania
Isicelo seKaizer Chiefs sokudayiselwa umdlali wasesiswini waseTanzania uFeisal Salum sichithiwe yi-Azam FC.
Lezi zinkunzi zaseSoweto kubikwa ukuthi besifake isicelo esiqinile esihambisana nemali ebhekile njengoba bezifuna lesi sihlabani esineminyaka engu-26 ubudala.
USalum ulokhu engumdlali ovelele kwiligi yaseTanzania kusukela kumasizini adlule.
Emizamweni wokumgcina, i-Azam FC ivele yamnunusela ngenkontileka entsha, naye wayisayina.
Lesi sinyathelo kuhloswe ngaso ukuvimba amaqembu anentshisekelo ngaye, okuhlanganisa nezimbangi zaseTanzania iSimba SC.
Umuntu ongaphakathi kwi-Azama utshele iFARPost ukuthi i-Azam FC izocubungula kuphela izicelo ezingaphezu kuka-R40 million.
Lesi samba sibonakala kuhloselwe ngaso ukudikibalisa amaqembu anesifiso sokuthenga lo mdlali.
“Ungumdlali wethu ongcono kakhulu, futhi ikilabhu ngokusobala ifuna ukumgcina ngazo zonke izindlela.
“Kuzothatha imali engaphezu kuka-5 Billion Shillings (imali yaseTanzania elinganiselwa ku-R40 million kweyakuleli) ukuze bacabange ngokumdedela,” kusho umthombo.
Leli qembu laseDar es Salaam kubikwa ukuthi likubeke kwacaca kwiChiefs neSimba ukuthi uSalum ubalulekile ezinhlelweni zalo zesikhathi esizayo.
I-Azam FC ithe ihlose ukuphonsela inselelo isicoco seligi nezinye izindebe.
