Ziqhatheke ‘kabi’ izinkunzi zaseSoweto kwiNedbank Cup
Emaqenjini amathathu aphezulu kuleli, i-Orlando Pirates yiyo ethole umdlalo onzima ngesikhathi kuqhathwa azodlala kwiNedbank Cup.
Iqembu likaJose Riveiro – elingompetha abavikela le ndebe – lizovakashela iRichards Bay FC eThekwini emzuliswaneni wokuqala.
INatal Rich Boyz isiziveze njengesitha esinzima samaBhakabhaka emidlalweni edlule yezindebe kanti izofuna ukukuphinda ekwenze phambilini.
IKaizer Chiefs iqhatheke ngendlela engabukeka ilula uma ubheka izinga iqembu ezodlala nalo elikulo.
EzikaNasreddine Nabi ziqhathwe neqembu le-ABC Motsepe League, iFree Agents FC yaseGauteng.
Kodwa, njengoba umlando ungufakazi, amaqembu amancane ayakwazi ukuphendula amafula, ashiye kukhalwa izwe lonke uma ebhekene neChiefs kulo mqhudelwano.
IMamelodi Sundowns nayo izodlala neqembu elidlala esigabeni esiphansi okumele izidlulele kalula kulo iSibanye Golden Stars.
IStars imele iFree State kwawe-ABC Motsepe League kanti ngokomlando weSundowns kulo mqhhudelwano uma ibhekene namaqembu asezingeni eliphansi, iStars izalelwe yinja endlini.
AmaZulu FC nawo ithole okufanele kube wumdlalo olula njengoba eqhathwe neMighty Eagles ye-ABC Motsepe League.
Isiyonke imidlalo iqhathwe kanje: Polokwane City v The Bees FC; Sekhukhune United v Cape Town City; Kaizer Chiefs v Free Agents FC; Mpheni Home Defenders v Hungry Lions; Magesi FC v SuperSport United; Mamelodi Sundowns v Sibanye Golden Stars; Royal AM v Milford FC; Richards Bay FC v Orlando Pirates; Venda FC v Cape Town Spurs; Golden Arrows v Chippa United; TS Galaxy v CR Vasco Da Gama; Stellenbosch FC v Kruger United; AmaZulu FC v Mighty Eagles; Lerumo Lions v Durban City; Umvoti FC v Baroka FC; Pretoria Callies v Marumo Gallants.
