Umgadli waseDRC untshontshe iso lezinhloli zeChiefs
Sekunomgadli waseDemocratic Republic of Congo osehehe iso lezinhloli zeKaizer Chiefs futhi kungenzeka leli qembu limlande ngoJanuwari.
Sekuvele imibiko ethi uBasiala Agee ungomunye wabagadli iChiefs esebenzela phezu kwabo njengoba ifuna ukuqinisa phambili nje.
Leli qembu likaNasreddine Nabi liyashoda phambili njengoba linoRanga Chivaviro, Wandile Duba no-Ashley Du Preez kuphela kubagadli.
Lisemkhankasweni oshubile wokuthungatha abagadli okungenani ababili abazokwazi ukushoka leli qembu phambili.
Manje, ngokombiko weKickOff, abahlwaya ikhono kwiChiefs, beholwa uThembela “Tera” Maliwa, bebeseLoftus muva nje, beyozibonela ngawabo lo mgadli.
U-Agee njengamanje udlala eqenjini langakubo i-AS Maniema Union ebidlala neMamelodi Sundowns koweCaf Champions League muva nje.
Kuthiwa lo mgadli oneminyaka engu-25 uzigculisile izinhloli zeChiefs kanti leli qembu seliqale izingxoxo zokudayiselwa yena.
“Izinhloli zeChiefs beziseLoftus Stadium ngoLwesibili (oludlule) ukuyobuka kahle lo mdlali,” kucashunwe umthombo usho kanje.
“UTera ubekhona ehambisana nezikhulu zeChiefs. Bachazekile ngaye. Usengomunye wabadlali abangase basayinwe ngoJanuwari.”
Uma egcina ngokusayina kwiChiefs u-Agee, uzofikela kuzakwabo waseDR Congo uChristian Saile ovele usemabhukwini ale kilabhu.
