AwaseGauteng ‘alinga’ i-Arrows ngomgadli wayo

Umgadli weGolden Arrows uLungelo Nguse kubikwa ukuthi uqashwe ngeso lokhozi amaqembu amabili amakhulu kwiBetway Premiership. 

Ngokusho komthombo osondelene nalo mdlali, lo mdlali oneminyaka engu-25 ubudala angase ashintshe iqembu ewindini lokudayiselana ngabadlali ngoJanuwari ozayo. 

Yize lo mthombo ungafunanga ukudalula amagama amaqembu agaqele ukusayina uNguse, i-Orlando Pirates kukholakala ukuthi ingelinye lamaqembu anentshisekelo ngalo mgadli.

UNguse uthathwa njengethemba elihle elizosiza amaBhakabhaka uma edlulela phambili kwiCaf Champions League njengoba uZakhele Lepasa esalimele nje. 

Lo mdlali we-Arrows useke wadlalela iBaroka FC, iBizana Pondo Chiefs, iTS Sporting ne-University of Pretoria.

“Ngeke ngikunike igama lamaqembu womabili ngoba kungase kubeke engcupheni izingxoxo kodwa amaqembu azinze eGauteng.

“Asebuze kaningana ngalo mfana,” kucashunwe umthombo usho kanje kwiPhakaaathi. 

• OLUNYE UDABA: Okwenza uNabi aseke uMaart onokugxekwa ngabeChiefs

Elinye iqembu eselike lavela kwangase afune lo mgadli yiKaizer Chiefs njengoba nayo isemkhankasweni wokuqinisa kubagadli.