UVan Rooyen uvuma ingcindezi ‘yejezi likaLorch’ kwiBucs
- Sibongiseni GUMBI
Umdlali wasemuva we-Orlando Pirates, uDeano van Rooyen, usevule isifuba ngokugqoka ijezi elingunombolo-3 kuleli qembu.
UVan Rooyen ujoyine iPirates esuka kwiStellenbosch FC ekuqaleni kwesizini ka-2024/25.
Usedlale imidlalo engu-12 kuyo yonke imiqhudelwano kusukela efikile kulezi zinkunzi zaseSoweto.
Ijezi elingunombolo-3 ulithole ngemuva kokuhamba kukaThembinkosi Lorch ojoyine iMamelodi Sundowns ngoJanuwari.
ULorch uhambe kwasala abalandeli bekhala njengoba ebengomunye wabadlali abangaconsi phansi kubo.
Ubesedlale imidlalo engu-158, washaya amagoli angu-34. Unqobe izicoco ezinhlanu neqembu, okuhlanganisa nezindebe ezine zeMTN8.
UVan Rooyen uvumile ukuthi wasizwa isisindo sale nombolo ngesokhathi enikwa yona. “Lapho ngifika lapha kwiPirates, kwakunezinombolo ezimbili kuphela ebengingakhethab kuzo,” kusho uVan Rooyen kwiBucs Camp.
“Bekukhona unombolo 77 nonombolo 3. Umqeqeshi (uJose Riveiro) wangibuza ukuthi, ‘Iyiphi inombolo ofuna ukuyithatha?’
“Mina ngathi, ngifuna u-77’,” kuchaza lo mdlali oseqanjwe abalandeli ngokuthi “Umjita 3”.
“Yena (Riveiro) uthe, ‘thatha unombolo 3’, ngase ngithi, ‘Cha, ngenxa yomlando wejezi, ngicabanga ukuthi lizoba likhulu kakhulu kunami’.
“Kodwa ngaleso sikhathi ngazibonela ukuthi ngingalenza elami leli jezi.
“Kwakunzima kancane, kodwa lapho ngijwayela, ngezwa sengathi manje ngingakwazi ukwenza umsebenzi kuleli jezi.
“Kusobala ukuthi abalandeli babejabule ngami, baze bangibiza ngoMjita 3. Kimina, bekuyinto efana nokuthi abalandeli bayangithakasela.”
