UNabi uyathimula ngekhadi elinikwe uFrosler
- Sibongiseni GUMBI
UNasreddine Nabi, ongumqeqeshi weKaizer Chiefs, useveze isikhalo sakhe ngesinqumo sekhadi elibomvu elikhishelwe uReeve Frosler emdlalweni wakamuva.
UFrosler ukhishwe ngekhadi elibomvu ngasekuqaleni kwesiwombe sesibili ngemuva kokuthola ikhadi lakhe lesibili eliphuzi ngomzuzu ka-47.
Yize kunjalo, iChiefs iqhubekile nomdlalo futhi yagcina inqobe ngo 2-1 ihlula iRichards Bay emdlalweni weBetway Premiership ePeter Mokaba Stadium.
Ekhuluma ngemuva komdlalo, uNabi uveze ukusingabaza isinqumo sikanompempe ngekhadi lesibili eliphuzi likaFrosler.
Lo mdlali wasemuva kwesokudla ukhahlele uNkosana Ndaba weRichards Bay obeshibilike ngesikhathi bebanga ibhola.
“Onompempe, angifuni ukuphawula kakhulu ngabo… Uzozibonela wena ngendaba yekhadi eliphuzi.
“Bekungeyona into efanelwe yikhadi njengoba umdlali (uNdaba) eshibilikile kwathi ngemuva kwalokho sathola ikhadi elibomvu,” kusho lo mqeqeshi.
“Mhlawumbe kuwo wonke umuntu obesenkundleni, ngunompempe kuphela obone leyanto iwukudlala kabi.
“Ngeke ke kodwa sikhulume ngonompempe kakhulu noma sibajaje,” kwengeza uNabi.
Indawo kaFrosler ibe seyithathwa uDillan Solomons, ongene wawenza kahle umsebenzi futhi wacishe wazitholela negoli kade ekhahlela ibhola ebelibekwe phansi.
Cishe uNabi uzoqhubeka naye uSolomons uma sebebhekene neRoyal AM khona ePeter Mokaba Stadium emdlalweni weligi kule mpelasonto.
