UBroos ukuthole kuDortley abekufuna koweBucs
- Sibongiseni GUMBI
UHugo Broos uthwale kanzima ukuthola umdlali wasemuva odlala ngonyawo lwesinxele ngesikhathi ethatha izintambo kwiBafana Bafana.
Lolu hlobo lomdlali aluvamile kwiPremier Soccer League. Isikhathi eside, uBroos ubethembele ku-Innocent Maela we-Orlando Pirates.
Yize uMaela engadlali njalo kuPirates, uBroos ubelokhu eqhubeka nokumqoka eqenjini lakhe ngoba nakhu eyinxele elidlala emuva maphakathi nenkundla.
Kodwa-ke, wagcina ephendukele kuGrant Kekana weMamelodi Sundowns, odlala indima efanayo eqenjini lakhe yize esebenzia unyawo lwesokudla.
NgoJuni, uRushwin Dortley wakhombisa ukuba ngumdlali othembiso ngesikhathi seCosafa Cup.
Ubedlala kwiCape Town Spurs ngaleso sikhathi kanti ibe seyimdayisela iKaizer Chiefs la afike wathola ukunakwa okwedlulele.
Ngesincomo sephini lomqeqeshi uHelman Mkhalele, uDortley ubizelwe eqenjini elikhulu leBafana Bafana.
Udlale imidlalo yokuhlungela iCAF Africa Cup of Nations (Afcon) ngo-Okthoba wabahlaba umxhwele abaqeqeshi.
Kusukela lapho, uDortley uqinise indawo yakhe eqenjini likaBroos. Lo mqeqeshi waseBelgium ubukeka esegcine emtholile umdlali wasemuva abemfuna.
Ekhuluma ngokudlala kwakhe kwiBafana muva nje, uDortley uthe okwenza kube lula kuye wukuthi indlela kaBroos nekaNasreddine Nabi omcija kwiChiefs icishe ifane.
