UMakaab usola ukugqilazwa kwabasebancane kwiChiefs
- Intatheli yeLISENETHINI
Imenenja yabadlali ebuye ibe ngumhlaziyi uMike Makaab uvumelana noManqoba Mngqithi ngokuthembela ngokweqile kweKaizer Chiefs kubadlali abasebancane.
UMakaab, ohlaziya kwiGagasi FM, uthi abadlali abasebancane badinga ukuvikelwa emaqenjini amakhulu njengeKaizer Chiefs.
UMngqithi usho okufanayo ngemuva kokuthi iSundowns ishaye iChiefs ngo 4-0 emdlalweni owandulela owamanqamu weCarling Knockout muva nje.
Umqeqeshi weChiefs, uNasreddine Nabi, uqale lo mdlalo obuseFNB Stadium ebigcwele phama ngabafana abathathu abasebancane.
UMduduzi Shabalala, uSamkelo Zwane, noWandile Duba bebefakwe ohlwini lwabadlali abaqala umdlalo.
UMfundo Vilakazi ungene esuka ebhentshini ngesiwombe sesibili.
Nokho, abadlali abasebancane abakwazanga ukumelana neSundowns engingadle nkobe zamuntu kulo mdlalo.
Ekhuluma ohlelweni i-Extratime, uMakaab uveze imibono yakhe ngalokhu, efakazela uMngqithi.
Uyakwesekwa ukunikwa kwabadlali abasebancane ithuba, kodwa indlela nesikhathi sokukwenza lokhu ibalulekile.
Wenze isibonelo ngokufakwa kancane kancane kukaRelebohile Mofokeng kwi-Orlando Pirates.
“Ngikholwa wukuthi abadlali abancane bayasidinga isikhathi sokudlala.
“Kodwa kunesikhathi esifanele salokho…,” kusho uMakaab.
Ubalule indlela umqeqeshi wePirates uRiveiro amethula ngayo kancane kancane uMofokeng. Ngokuthola kwePirates ifomu, uMofokeng waqala ukudlaliswa kaningi futhi manje usejwayele.
UMakaab ugcizelele ukuthi ukuhlulwa kweChiefs bekungoba kungamaphutha abadlali abasebancane.
“Impela uZwane wenze iphutha eliholele ekutheni kudaleke iphenathi,” usho kanje.
“Kodwa amaphutha enzeka ngaphansi kwengcindezi.
“Abadlali abadala yibo abadlisele iChiefs kakhulu ukwedlula abasebancane,” kuphetha uMakaab.
