Kuvuka umunyu kuKopo ngesihluku sakwiSuperSport
- Alfred NGUBANE
UKwanele Kopo usebhoboke ngobuhlungu asenabo enhliziyweni yakhe ngendlela aphatheka ngayo kwiSuperSport United.
Lo mqeqeshi weChippa United, utshele iLisenethini ukuthi uma ecabanga umdlalo wezakhe olandelayo, kuvuka iminju.
Ukhale ngendlela yena yephini lakhe, uThabo September abaphathwa kabi ngayo ngabaphathi beSuperSport.
“Yimina engasungula inkulisa yeSuperSport United kade ingekho,” kuchaza lo mqeqeshi kuleli sonto.
“Kodwa uma ngabe sekumele ngiqeqeshe iqembu elikhulu, bangoxoshisa okwenja.”
UKopo uthe lesi silonda esisenhliziyweni yakhe asivumi ukuphola ngoba wanikela ngeminyaka yakhe eminingi kwiSuperSport.
Uthe kwalandwa abaqeqeshi abalingana naye njengo-Eric Tinkler ekhona, kwaphinde kwaqashwa uKaitano Tembo ngaphambi kwakhe.
ISuperSport uyikhiqizele inqwaba yabadlali egcine ibadayisela amaqembu ehlukene, yenza imali eningi ngabo.
Ugcine eshiyile kuleli qembu ngesizini edlule njengoba eqashwe yiChippa ukuyiqeqesha ngokubambisana noSeptember.
Ekuqaleni kwale sizini iChippa ibahlukanisile, yabeka uKopo njengomqeqeshi, uSeptember wehliselwa ekubeni yiphini.
Lokhu kwenzelwa ukuthi uSeptember abe nesikhathi sokubeka neso ezinkulisa zeqembu, akwazi ukulekelela nakuzo.
