Seziqinisekisiwe izinsuku nezinkundla zeyeCarling Knockout 

• Sibongiseni GUMBI

IPremier Soccer League (PSL) isimemezele ngokusemthethweni izinsuku, izinkundla, nezikhathi zemidlalo yomzuliswano wesibili weCarling Knockout. 

Le midlalo emine ihlelelwe impelasonto Novemba 2 no-3. Umdlalo wokuqala uzoba seKing Zwelithini Stadium KwaZulu-Natal ngoMgqibelo, kaNovemba 2. 

Kulo mdlalo, iRichards Bay FC, esithwele amathemba eKwaZulu-Natal, izobhekana neCape Town City, kanti umdlalo uyoqala ngo-3 ntambama. 

Ngokuhamba kwesikhathi ngalo lolo suku, kuyobe sekuqala umdlalo cishe obhekwe kunayo yonke kulesi sigaba salo mqhudelwano.

Kulo mdlalo iKaizer Chiefs iyobe ibhekene ngqo neMamelodi Sundowns eFNB Stadium. Umdlalo wabo uyoqala ngo-6 ebusuku.

NgeSonto likaNovemba 3, iTS Galaxy FC izobhekana neMagesi FC eMbombela Stadium. 

Umdlalo wokugcina walesi sigaba uzoqhatha iMarumo Gallants ezokwamukela iStellenbosch FC eDr Molemela Stadium eMangaung. Yomibili imidlalo yangeSonto ihlelelwe ukuqala ngo-3. 

IPSL iphinde yaveza ukuthi imidlalo eyandulela owamanqamu yeCarling Knockout iyodlalwa nfoNovemba 9 no-10. Owamanqamu wona uyobe sewudlalwa ngoNovemba 23. 

“Lezi zinguquko zenziwe ngenxa yokulungiswa kwekhalenda lemiqhudelwano yamaqembu yeCaf,” kusho iPSL esitatimendeni. 

“Amathikithi ayo yonke imidlalo yama-quarter-final azotholakala ezitolo ze-TicketPro ezweni lonke. 

• OLUNYE UDABA: Ngabe uRiveiro uselungela ukulahlekelwa uSaleng?

“Ithikithi ngalinye libiza u-R50 kanti azoqala ukudayiswa namuhla (ngoLwesine) ntambama.”