IBucs ‘ixegiselekile’, kwaqansa kwiChiefs kweyeCarling Cup
- Sibongiseni GUMBI
I-Orlando Pirates iphinde yanikezwa isiqalo esihle kwiCarling Knockout Cup ngemuva kokuqhathwa nomakoti besigaba esiphezulu, iMagesi FC.
Ibuya ekunqobeni iMTN8, iPirates izohlangana neMagesi emzuliswaneni wokuqala wale ndebe yeligi ezoqala ngasekupheleni kuka-Okthoba.
Kodwa lokhu kungaba obucayi kwi-Orlando Pirates okufanele ukuthi yacabanga ukuthi zimbiwe yinsele nangesizini edlule uma iqhathwa neRichards Bay.
AmaBhakabhaka ahlulwa ngo 1-0 yiRich Boyz, aphuthwa yithuba lokuqoqa izicoco ezintathu ngesizini eyodwa.
Ukuqhathwa kwemidlalo yesigaba sokuqala seCarling Knockout Cup kwenzeke ngoLwesibili ntambama.
Kuzobe kungokwesibili lo mqhudelwano owavala isikhala seTelkom Knockout Cup udlalwa.
Ngonyaka odlule, iStellenbosch FC yiyo eyaba ngompetha bokuqala ngemuva kokuhlula i-TS Galaxy kumaphenathi eMoses Mabhida Stadium.
Lena kwakuyindebe yokuqala yaleli qembu laseKapa kanti akungabazeki ukuthi lizobe libheke ukuyivikela.
Kulo nyaka, labo mpetha bazoqala ukuvikela isicoco enkundleni abasinqoba kuyo njengoba bezovakashela AmaZulu FC eThekwini.
Khonamanjalo, omunye wemidlalo egqamile kuLast 16 wumdlalo weSuperSport United neKaizer Chiefs, obekuwumdlalo wokuqala oqhathwe ngoLwesibili.
Lo mdlalo uzoba yinselelo kuwo womabili lamaqembu asemizamweni yokubuyela ekubeni ngamaqembu anqoba izicoco.
Yonke imidlalo engu-16 yokugcina: SuperSport United vs Kaizer Chiefs; Richards Bay vs Sekhukhune United; AmaZulu vs Stellenbosch FC; Polokwane City vs Marumo Gallants; Cape Town City vs Royal AM; TS Galaxy vs Chippa United; Orlando Pirates vs Magesi; Mamelodi Sundowns vs Golden Arrows
