Kuvela okucike owe-AS Vita osule esidlangalaleni
- Sibongiseni GUMBI
IStellenbosch FC inqobe i-AS Vita ngo 2-0 emzuliswaneni wesibili wokuhlunga kwiCaf Confederation Cup, kwasuka izidubedube.
Umdlalo bewuseCape Town Stadium ngoLwesihlanu ebusuku.
UThabo Moloisane noLehlohonolo Mojela yibo abashaye amagoli, abeke iStellies endaweni enhle.
Abalandeli be-AS Vita bebebaningana enkundleni kodwa bacikekile ngendlela iqembu elidlale ngayo.
Intukuthelo yabo bayibhekise kumqeqeshi u-Abdeslam Ouaddou.
Uzidalele amazinyo abushelelezi naye ngesikhathi enza uphawu olukhombisa ukuthi uthi ‘gede’ kubo.
Uthe ephuma enkundleni ekupheleni kwesiwombe sokuqala, wabe esejikijelwa ngezibi.
Izinkinga ze-AS Vita ziqale ngesikhathi ihluleka wukufika ngesikhathi esifanele eKapa.
Ifike ngoLwesihlanu (usuku lomdlalo) ngo-4 ezintatha kanti kuthiwa beyinezinkinga zezimvume zokungena kuleli.
Nokho iqembu lenze kangcono esiwombeni sesibili, kodwa iStellies yakwazi ukubambelela, yagcina inqobile.
Ngemuva komdlalo, u-Ouaddou umangaze wonke umuntu ngokumemezela ukuhoxa kwakhe kulo msebenzi.
Ukhale ngokungahleleki kwabaphathi, ikakhulukazi ukufika ngosuku lomdlalo, njengesizathu.
“Siqale umdlalo engxenyeni yesibili kuphela ngoba, engxenyeni yokuqala, besisesendizeni,” kuphawula u-Ouaddou.
Uhalalisele abadlali bakhe ngemizamo yabo, kodwa ukungeneliseki kwakhe bekusobala.
Ukuhoxa kuka-Ouaddou kuthuse wonke umuntu, ngisho abadlali bakhe abazwe lezi zindaba emhlanganweni nabezindaba.
Ukwenze kwacaca ukuthi ngeke esakwazi ukusebenza ngaphansi kwezimo ezinjalo.
OLUNYE UDABA: UMaduka uvuma ukusinda kwensimbi kwiRoyal AM
IStellenbosch izoya eDR Congo ukuyodlala umlenze wesibili ngeSonto likaSepthemba 22.
