Ushonelwe ngunina umqeqeshi weCity
- Sibongiseni GUMBI
ICape Town City isimemezele ukuthi umqeqeshi wayo, u-Eric Tinkler, usemanzini njengoba eshonelwe ngunina.
Udlule emhlabeni ngempelasonto. Ikilabhu iveze lezi zindaba ezibuhlungu ezinkundleni zokuxhumana, idlulisa amazwi enduduzo.
“Sidlulisa ukuzwelana kwethu nomqeqeshi wethu, u-Eric Tinkler, kulandela ukushona kukanina ngempelasonto,” kusho iqembu.
Lengeze ngokuthi imicabango nemithandazo yalo ikuTinkler nomndeni wakhe kulesi sikhathi esinzima.
ICity izwakalise ukumeseka uTinkler, yathi, “Wonke umndeni weCape Town City FC umi nawe.”
Lezi zindaba ziqhamuke ngemuva kokwehlulwa kweCity ngo 2-0 yi-Orlando Pirates emlenzeni wesibili wemidlalo eyandulela owamanqamu kwiMTN8.
Umdlalo womlenze wokuqala obuseCape Town Stadium, uphele zibambene ngo 1-1 nokwanika iCity ithemba lokuthi isangangena kowamanqamu.
Nokho, ibhekane neqembu elinzima kakhulu e-Orlando Stadium, iPirates yakwazi ukungena kowamanqamu iminyaka emithathu kulandelana.
