IStellies ibuyise isithunzi selakuleli e-England
USandile Luthuli oyisikhulu esiphezulu kwaMultiChoice uthi iqembu leStellenbosh FC labafana abaneminyaka engaphansi kuka-19 libuyise isithunzi sebhola lakuleli e-England.
Leli qembu leStellies linqobe i-English Premier League Gen Cup, ishaya amaqembu akhona anjengoTottenham Hotspur, Aston Villa, neCrystal Palace.
ULuthuli uthi iStellies sishiye abantu bengawuvali umlomo e-England.
“Abaphathi bamaqembu ase-England baqale basho ngazwilinye ukuthi ibhola lisekhona kuleli,” kusho uLuthuli.
Amaqembu ase-England bese ekhohliwe yimakethe yakuleli ngenxa yezinga eliphansi.
Kumanje munye umdlali wakuleli odlala kwi-English Premier League okunguLyle Foster okhonjwa kwi-Ipswich Town engomakoti kule ligi.
Ngaphambilini, amaqembu ase-England ahlomula emakethe kuleli ngabadlali abanjengoLucas “Rhoo” Radebe, Phil Masinga beLeeds United, Aaron Mokoena Rovers, noBenni McCarthy ababekuBlackburn Rovers.
Kukhona noStephen Piernaar oyinkakha ye-Everton, uQuantin Fortune owayekwiManchester United, uKagisho Dikgacoi owayekwiCrystal Palace no-Andre Arendse owayevimba kwiFulham.
Khonamanjalo izoqala imidlalo yeDStv Diski Challenge iyaqala kule mpelasonto ezinkundleni ezahlukene.
Amaqembu aKwaZulu-Natal azodlala namaqembu aseGauteng emidlalaweni yawo yokuqala.
AmaZulu FC azotholana phezulu ne-Orlando Pirates, iGolden Arrows izodlala neKaizer Chiefs, iRichard Bay FC yona idlale neMamelodi Sundowns bese iRoyal AM ivovane inkani neTS Galaxy.
Yonke le midlalo izoba seKing Zwelithini Stadium ngoMgqibelo – owokuqala ungo-10 ekuseni.
Eminye izoqedelwa ngeSonto kuyo le nkundla efanayo. Kunxuswe abalandeli ukuthi bayozitika ngaleli dili lemidlalo.
