Uzothembela kubafana abancane uBarker ‘ochuthwayo’

• Alfred NGUBANE

Kumenza aziqhenye uSteve Barker ukuthi usephenduke umshini okhiqiza abadlali abahalelwa nangamaqembu amakhulu. 

UBarker usekhiphe abadlali abanohlonzo abanjengoDeono Van Rooyen, Ox Mthethwa, Iqraam Rayners, Andile Jali, Mthokozisi Yende, no-Ashley Du Preez ukubala nje abambalwa. 

IStellensbosch FC, aqeqesha kuyo njengamanje, isiphenduke isitolo njengoba amaqembu amaningi efuna abadlali bayo. 

Kumanje kunombiko othi isivumile ukudedela u-Antnio Van Wyk ofunwa yiqembu laphesheya kwezilwandle.

Lo mdlali ubekhona nasohliwni lwabafunwa yiKaizer Chiefs kodwa sekuvele iqembu lase-Austria, labela imali enhle etafuleni. 

Yize belokhu behamba abadlali bakhe – kusangenzeka kuphinde kuhambe abanye ababili – uBarker uthi unabo abanye abancane abazovala izikhala. 

UBarker unethemba elikhulu lokuthi abadlali bakhe abasebancane bazomenzela umsebenzi  omuhle uma sebebheke neMamelodi Sundowns.

Kuvela ukuthi bobabili oFawaaz Basadien no-Ismael Toure sebefake izicelo zokuthi badayiswe kuleli qembu.

UBasadien ufuna ukuya kwiChiefs esike yavela kwiStellies ngalo mdlali kodwa yachithwa. 

UToure yena ufuna ukuya kwi-Orlando Pirates okuthiwa nayo ike yazama ukumfuna kodwa iStellies yacela ukuthi ike ime okwamanje.

EzikaBarker, iStellenbosch FC, zizogadulisana neSundowns emdlalweni womlenze wokuqala kweyandulela owamanqamu kwiMTN8. 

OLUNYE UDABA: URamoreboli akayisabi, uyayihlonipha iPirates

Lo mqeqeshi onqobe indebe yakhe yokuqala ngesizini edlule, uthi ubahlomise ngolwazi olwanele abadlali bakhe.