‘Inhliziyo ka-Appolis ayisekho nhlobo kwiPolokwane’

• Intatheli yeLISENETHINI

Umdlali wasesiswini weBafana Bafana u-Oswin Appolis ufuna ukushiya eqenjini leBetway Premiership iPolokwane City ngaphambi kokuthi kuvalwe iwindi lokuhwebelana ngabadlali. 

Umbiko we-SportsWire.co.za uthi u-Appolis usevele uvumelene ngakho konke nezikhondlakhondla zaseTunisia i-Esperance de Tunis. 

Lo mdlali oneminyaka engu-22 uzimisele ngokuyozihlola ngokubhekana nenselelo entsha ebholeni lakhe.

U-Appolis ujoyine iPolokwane City esuka kwiPretoria Callies ngoJulayi ka-2023 futhi unenkontileka kuze kube ngu-2026. 

Naphezu kwenkontileka yakhe, uzimisele ngokuqhubekela phambili ngemuva kokudlala indima ebalulekile empumelelweni yeqembu ngesizini edlule. 

Ngesizini edlule iPolokwane iqede endaweni yesishiyagalombili. U-Appolis ubonakale emidlalweni engama-31, washaya amagoli ayisikhombisa. 

Ukudlala kahle kwakhe kumtholele indawo kwiBafana Bafana kaHugo Broos, eqede endaweni yesithathu kwi-Africa Cup of Nations ngoFebhuwari. 

Le mpumelelo ka-Appolis isihehe isasasa emaqenjini amaningi, okubalwa iWydad Athletic Club, iZamalek, CR Belouizdad, MC Alger, neKaizer Chiefs.

Manje kubukeka sengathi iPolokwane izokuthola kunzima ukugcina lesi sihlabani sayo njengoba sizimisele ngokufudukela kwi-Esperance.

OLUNYE UDABA: URiveiro akawuvali umlomo ngePirates ‘eqinile’

Uma kwenzeka lokhu, uzojoyina uzakwabo weBafana u-Elias Mokwana ojoyine lezi zinkunzi zaseTunisia ngenyanga edlule.