UMaela uveza angakuthandi ngokuqhathaniswa kwePirates

• Intatheli yeLISENETHINI

Ukaputeni we-Orlando Pirates u-Innocent Maela ukholwa ukuthi akulungile ukuqhathanisa isikwati esikhona manje neqembu elafinyelela kowamanqamu weCaf Confederation Cup eminyakeni emibili edlule. 

UMaela, nguye owayehola leli qembu lePirates, akajabule ngokuqhathaniswa okukhona ngaphambi komdlalo wabo weCaf Champions League neDisciples FC yaseMadagascar.

Lo mdlalo uzoba se-Orlando Stadium ngoLwesihlanu ngo-7.30 ebusuku. 

“Angiboni kukuhle ukubuyela eqenjini elidlale umdlalo wamanqamu (weConfed Cup) ngoba iningi lalabo badlali abasekho lapha,” kusho uMaela. 

Ugcizelele ukuthi leli yiqembu elisha elinabadlali abanamava ahlukile. 

Uthi iqembu elikhona njengamanje ligxile ekuziqopheleni umlando walo kulo mqhudelwano. 

UMaela uveze isifiso seqembu elikhona njengamanje ngalo mqhudelwano. 

“Sifuna ukuhamba kakhulu kulo mqhudelwano futhi sikhule ebholeni lezwekazi,” kwengeza yena.

Ugcizelele ukuthi abadlali bazimisele ngokuzakhela owabo umlando. 

“Kubadlali abaningi, kuyithuba lethu lokukhula kulo mqhudelwano kodwa siya kuwo ngokukhulu ukuzithoba.”

UMaela ubuye wakhuluma ngokuzimisela kweqembu ukuqhudelana nezihlabani zezwekazi. 

OLUNYE UDABA: Ubuyele kwiPirates uSiyabonga Mpomtshane

“Sizimisele kakhulu futhi sifuna ukuba kulo mqhudelwano isikhathi eside.”