Lithathekile elaseGermany ngabagajwa yizinkunzi zaseSoweto

• Inatheli yeLISENETHINI

Iqembu leGerman Bundesliga, i-FC Augsburg, elisanda kuba seNingizimu Afrika la belilungiselela khona isizini laphinde ladlala kwiMpumalanga Premier’s Cup, lingase libuye maduze. 

Imibiko iveza ukuthi ithimba labaqeqeshi kule kilabhu lihlabeke umxhwele ngabadlali ababili be-TS Galaxy. 

Kulindeleke ukuthi baqaphe ngeso lokhozi oSamukelo Kabini noPuso Dithejane kule sizini, ngokombiko we-iDiski Times.

Bobabili laba badlali, abaneminyaka engu-20, bashaye igoli ngamunye ngesikhathi iTS Galaxy inqoba ngo 2-1 kowamanqamu weMpumalanga Premier’s Cup. 

UKabini, ongumdlali wasemuva maphakathi nenkundla oyinxele, ungomunye wabavelele kuleli qembu kusukela afika esuka eqenjini le-Orlando Pirates leDStv Diski Challenge. 

UDithejane, obengumdlali wasemuva kwesokudla kwiKaizer Chiefs, useguqulwe waba umdlali wasesiswini odlala ophikweni.

Futhi manje lo mdlali owabalekela ukuqoqa amabhola kwiChiefs usengomunye wabadlali abashisa izikhotha eNingizimu Afrika.

LO mbiko uveze ukuthi umqondisi we-Augsburg, uMarinko Jurendic, uthatekile kakhulu ngalaba badlali.

Futhi uhlela ukubhekisisa ukuqhubeka kwabo kule sizini kwiBetway Premiership. 

Uma uKabini noDithejane beqhubeka nokwenza kahle, kungenzeka ukuthi bazithole sebelandwa yileli qembu leBundesliga. 

OLUNYE UDABA: Ngabe iChiefs izokwenza eseDowns ngolimele?

Amathuba okubuya kwe-Augsburg izobheka ithalente kuleli agqamisa ukubuya kwesithunzi sabadlali baseNingizimu Afrika ezingeni lomhlaba.