Uhlanjalazwe emphakathini owayevimba kwiChiefs neBucs
- Intatheli yeLISENETHINI
Owayengunozinti weKaizer Chiefs ne-Orlando Pirates, uBrilliant Khuzwayo, ufunwa uthuli abathwebuli bezithombe ababambise udonga ngenkokhelo.
UKhuzwayo, owasheshe wathatha umhlalaphansi ebholeni elikhokhelayo ngenxa yokulimala, ukweleta u-Ayanda Zondi we-Ayanda Shots u-R8 000.
UKhuzwayo uqashe uZondi ukuthi ashuthe futhi afake izithombe ezinkundleni zakhe zokuxhumana ngesikhathi somqhudelwano iBrilliant Cup U19 ka-2024.
Lo mqhudelwano ubungoJulayi 27 no-28 eGlebelands Stadium, eMlazi.
Ngenxa yobuningi bomsebenzi kwadingeka ukuthi uZondi aqashe abanye abathwebuli ababili ukuthi bamlekelele.
UKhuzwayo wathembisa uZondi ukuthi uzomkhokhela ngo-Agasti 2, kodwa namanje akakakhokhi.
Sekuphele izinsuku ezingu-17 elindile uZondi engayitholi imali. Lokhu kumshiye ekhungathekile furhi ecasukile.
“Okubuhlungu kakhulu wukuthi abasizi ebengibaqashile bangihlezi entanyeni (bafuna inkokhelo yabo).
“Uma ngimfonela noma ngimthumelela umyalezo akaphenduli,” kubhala uZondi obecikekile ezinkundleni zokuxhumana.
UZondi uzwakalise ukuphatheka kabi ethi okubuhlungu kakhulu ukuthi uyazi ukuthi uKhuzwayo wenza imali ebhekile ngalo mqhudelwano.
“Amaqembu abengu-40, ngalinye likhokha u-R1 000 wokungenela okumnike u-R40 000.
“Angazi ukuthi kungani engakwazi ukukhokhela umsebenzi wami.
“Ngaphezu kwalokho wawunabaxhasi abaphusile lo mqhudelwano,” kuchaza uZondi.
Ethintwa uKhuzwayo ngalolu daba, uqale wacela ukubuye afonelwe kodwa wagcina eseluziba, ngokubika kwe-The Purpose.
OLUNYE UDABA: Ushiye icala elibi emuva oya kwiSundowns
Lesi simo sishiye uZondi nabasizi bakhe bengaholile futhi bekhungathekile, ukuthula kukaKhuzwayo yikho okubaxaka kakhulu.
