Iya kwiStellies iDowns ephume ngeyenaliti kwiPolokwane
- Sibongiseni GUMBI
Kuzomele yenze kangcono kakhulu iMamelodi Sundowns emzuliswaneni wemidlalo eyandulela owamanqamu kwiMTN8 uma isifuna lesi sicoco.
Leli qembu laseTshwane liqale ngegiya eliphansi, laphuma ngembobo yenaliti kwiPolokwane City ngeSonto ntambama.
IPolokwane idaze inkani yesele kulo mdlalo, kodwa yafulathelwa yinhlanhla esikhathi esengeziwe.
UThabang Matuludi uthe uzama ukukhipha ibhola, ngeshwa lakhe lavele layokhalakathela enethini yangakubo.
Kwenzeka lokhu nje iSundowns beyingasaphelele kulandela ukukhishwa kukanozinti uDenis Onyango ngekhadi elibomvu.
Lokhu kwenzeke esiwombeni sesibili kulandela ukuthi evimbe ibhola ngezandla esengaphandle kwebhokisi lakhe.
Yize yehluliwe, kodwa iPolokwane ikhombise ukuba yiqembu elizimisele njengoba ingazange iyivumele iSundowns izenzele.
Manje iSundowns seyiya kwiStellenbosch FC okuyiyona eqhathwe nayo kweyandulela owamanqamu.
Lokhu kuqhathwa kwamaqembu kwenzeke ngemuva komdlalo wangeSonto, kanti i-Orlando Pirates yona izobheka neCappe Town City.
OLUNYE UDABA: Imibuzo uFohloza engekho ebhentshini leDowns
Imidlalo eyandulela owamanqamu inemilenze emibili kanti iSundowns izoqala ekhaya kowokuqala, bese iCity nayo ibe sekhaya kowesibili.
- Umdlalo wokuqala: Sundowns v Stellenbosch FC
- Umdlalo wesibili: Cape Town City v Orlando Pirates
