UTinkler ucacisa eyozovala esikaMayo ovaleleke phesheya
- Intatheli yeLisenethini
Umqeqeshi weCape Town City, u-Eric Tinkler, usekuqinisekisile ukuthi iqembu selisayinise umdlali ozovala isikhala sikaKhanyisa Mayo, osanda kujoyina iqembu lase-Algeria iCR Belouizdad.
Nokho, umdlali omusha osayiniswe eFrance nowake wadlalela iMaritzburg United, u-Amadou Soukouna, usabambekile phesheya ngenxa yezinkinga zamaphepha.
“UMayo ube namasizini amabili amahle kakhulu futhi ubephuma kumaphephandaba masonto onke,” kusho uTinkler.
“Bekuthiwa, ‘UMayo ubezoya kwi(Mamelodi) Sundowns, uMayo uya (kwiKaizer) Chiefs, uMayo uya lapha, uMayo uya lena’.
“Kodwa ngakusho lokhu phambilini ukuthi njengeqembu ngeke size sime endleleni yokuthi umdlali athuthuke futhi enze impilo yakhe ibe ngcono,” kuchaza uTinkler.
UTinkler ukugcizelele ukuthi iqembu belizimisele ngokuthungatha ozovala isikhala sakhe, echitha eyokukuthi bakucabange ngemizuzu yokugcina lokhu.
“Bekumele sihlale sisiqaphile leso simo. Abantu abaningi bacabanga ukuthi sisukume ngomzuzu wokugcina kodwa saqala kudala ukuhlwaya kwethu.
“Kade sabheka ukuthi sifuna ukuletha bani, oyisima kanjani, oziphethe kanjani nokuthi uzofitha kanjani eqenjini.”
Yize kubambezeleke ukufika kukaSoukouna, uTinkler uyazethemba ngokuqina kwesikwati njengamanje.
“Besinomuntu ozovala isikhala sakhe ngebhadi okwamanje akakwazi ukungena kuleli ngenxa yokuthi uvaliwe.
“Kodwa sinethemba lokuthi leso simo sizosixazulula ngokushesha,” usho kanje.
Lo mqeqeshi ujabulile ngenqubekela phambili yomgadli osemncane uJody Ah Shene, odlale kahle ngesikhathi sokulungiselela isizini.
“UJody osemncane uliphakamisile impela izinga, wenze kahle impela kuze kube manje emalungiselelweni esizini.
“Ngakho-ke, sijabule kakhulu ngenqubekela phambili yakhe. Simbolekise uLuke Daniels ngoba sibona sengathi udinga isikhathi esengeziwe sokudlala.
OLUNYE UDABA: Noma engasidla, uMngqithi ngeke achome ngeseligi
“U-Prins (Tijueza) yena ubuyile ekulimaleni, futhi engadlala njengo-9 noma u-9 ocashile. Ngakho-ke, sinebadlali abambalwa esingaqoka kubo.”
