Sekusemthethweni, uSirino useyiKhosi
- Sibongiseni Gumbi
IKaizer Chiefs seyikumemezele ngokusemthethweni ukuthi seyisayine umdlali odabuka e-Uruguay uGaston Sirino.
USirino, oneminyaka engu-33, usayine iminyaka emibili kuleli qembu laseNaturena kanti izindaba zokuthi usesayinile ziqinisekiswe yiqembu ngoMgqibelo ntambama.
“IKaizer Chiefs seyiqinise iqembu layo kubadlali abahlaselayo ngokuthola uGaston Sirino.
“Lo mdlali wase-Uruguay usayine inkontileka yeminyaka emibili neGlamour Boys,” ibhale kanje iChiefs.
Ukumemezela kwayo bese kuwukuqinisekisa nje njengoba kulalwe ngoLwesihlanu sekwaziwa ukuthi lo mdlali uke wafika eNaturena.
Kugcwale izithombe zakhe eseNaturena ezinkundleni zokuxhumana, lanyuka isasasa ngaye kubalandeli.
Kuze kwasuka nezimikiswano ngenombolo yejezi okumele ayigqoke, abaye bethi akathathe eshiywe uKeagan Dolly, unombolo 10.
Ubevele egqoka yona nakwiMamelodi Sundowns emchithile ekupheleni kwesizini, imtshela ukuthi inkontileka abenayo ngeke isavuselelwa.
Lukhulu ke oluzobhekwa kulo mdlali kwiChiefs njengoba engeyena owokuqala ukusuka kwiSundonws eze kuyo.
OLUNYE UDABA: UZwane uveza ukumethemba uFohloza ‘ozithulelayo’
Abafike phambi kwakhe abawenzanga ngendlela abebebhekwe ngayo umsebenzi ngakho ingcindezi izoba ningi kuye.
