URiveiro usemtholile ozovala esika-Elmanara kwiPirates
– Intatheli yeLisenethini
Umkhankaso we-Orlando Pirates wokuthngatha iphini lomqeqeshi sewube nemiphumela emihle njengoba leli qembu lizomemezela ukuqashwa kukaCarlos Nodar Paz ezinsukwini ezizayo.
Lezi zinkunzi zaseSoweto zisale zingenalo ipjhini lokuqala lomqeqeshi ngemuva kokuthi uSergio Elnemara eshiye isikhundla sakhe ekupheleni kwesizini edlule.
U-Elnemara wachaza ukuthi into emenza ahambe wukuthi usanda kuthutha umndeni wakhe ewususa ngakubo eSpain wayowakhisa ePoland.
Manje njengoba kungumkakhe nezingane nje kuphela, bakuthola kunzima ukuzinza kuleli zwe elisha, ikakhulukazi njengoba yena engekho.
Ngokusho kwePirates, wayecele ukuhamba maphakathi nesizini kodwa wancengwa ukuthi asale eseyiqeda.
Lokhu kushiye umqeqeshi uJose Riveiro, naye odabuka eSpain, esele noMandla Ncikazi kuphela ozomsiza ekuholeleni iPirates emadlelweni aluhlaza.
Ngenxa yokuthi kukhulu okulindelwe kuRiveiro ngesizini ezayo – okungaphezu kwezindebe ezimbili azinqobe kumasizini amabili edlule – ubekudinga ukuqinisa ethimbeni lakhe labaqeqeshi.
Iqembu limnike inkululeko yokuzikhethela iphini lakhe elisha, kanti kubikwa ukuthi uPaz nguye ozikhethele yena.
UCarlos Nodar Paz, odabuka eSpain, uletha ingcebo yolwazi emsebenzini wakhe wokuqeqesha aluzuze ezweni lakubo nase-Asia.
UPaz owaziwa ngobuchule bakhe nekhono lokuthuthukisa abadlali, kulindeleke ukuthi abe yingxenye ebalulekile yabaqeqeshi kwiPirates.
Uzoba wusizo kakhulu njengoba leli qembu libophele inqwaba yabadlali abasebancane abadinga ukunakwa futhi belulekwe kahle.
Ulwazi lwakhe lwamazwe ngamazwe nokuqonda amasiko ehlukene ebhola kwenza uPaz abe ngumuntu obukeka ezoba wusizo kakhulu.
Akukacaci ke nokho okwamanje ukuthi uPaz uzothatha esokuba yiphini lokuqala lomqeqeshi noma uNcikazi uzokhushulelwa kuleso sikhundla bese yena ethatha indawo yesithathu.
OLUNYE UDABA: IChiefs igaxele ngabadlali bangaphandle?
Kungakhathalekile ukuthi lunjani uhlaka lwabaqeqeshi, ukuqokwa kukaPaz kuyisu elihlose ukuqinisa ithimba labaqeqeshi nokuqinisekisa ukuthi i-Orlando Pirates ingakwazi ukuqhudelana ezingeni eliphezulu ngesizini ezayo.
