IChiefs iqinisekisa ukuqokwa kukaNabi, imemezele nethimba lakhe
Intatheli yeLisenethini
IKaizer Chiefs isimemezele ngokusemthethweni ukuqashwa kukaMohamed Nasreddine Nabi njengomqeqeshi omusha weqembu labo elikhulu labesilisa.
Iqembu noNabi bavumelene ngenkontileka yeminyaka emibili enombandela wokwengeza unyaka uma izinhlaka zombili zivumelana.
“Ngemuva kokuhlwaya okunzulu, siyajabula ukwamukela umqeqeshi wethu omusha kwiKaizer Chiefs,” kusho umqondisi wezemidlalo, uKaizer Motaung Jr.
“Sikholwa wukuthi sesithole indoda efanele ezofeza umbono wethu wokubuyisela Amakhosi endaweni yawo ebholeni lakuleli.
“Sithembisa ubumbano nokweseka ekufezeni izinhloso zethu.”
UNabi, ungumqeqeshi ohlonishwayo ongowokuzalwa eTunisia, ufika nenqwaba yesipiliyoni kuMakhosi.
Useke wasebenza emaqenjini aphezulu eLibya, DR Congo, Egypt, Sudan, UAE, Tanzania naseMorocco.
Usewine izicoco ezehluekene emazweni ehlukene futhi unamava nasemiqhudelwaneni yamaqembu yase-Afrika.
UNabi unqobe isicoco seCaf Confederation Cup neFC Leopards yaseCongo.
Lo mqeqeshi oneminyaka engu-58 ubudala unelayisensi yokuqeqesha ye-Uefa Pro.
UNabi ufike nethimba lakhe elizomlekelela kulo msebenzi wakhe, kulo kukhona:
UKhalil Ben Youssef – Uyiphini lokuqala lomqeqeshi. Ubesebenza noNabi kwi-AS FAR eMorocco. Ngaphambi kwalokho babebonke kwiYoung Africans eTanzania.
UFernando Da Cruz – Uyiphini lomqeqeshi lesibili. UCruz unelayisensi ye-Uefa Pro. Lo mqeqeshi odabuka eFrance usebenze eBelgium, France naseMorocco phambilini.
U-Ilyes Mzoughi – Ungumqeqeshi wonozinti. Unolwazi olunzulu aluthole emaqenjini ase-Afrika, Middle East, okuhlanganisa kuwo neqembu lesizwe laseMauritania ne-Esperance de Tunis.
USafi Majdi – UyiStrength and Conditioning Coach nephini lomqeqeshi. Usebenze nabadlali bebhola abaphambili namaqembu ahamba phambili e-Afrika, okuhlanganisa i-Etoile du Sahel yaseTunisia, iRaja Casablanca, neWydad Athletic yaseMorocco.
OLUNYE UDABA: OwePhakwe Gas uhlose lukhulu ngoxhaso lweRichards Bay
Abasebenzi abasha bethimba labaqeqeshi sebevele bawuqalile umsebenzi wabo njengoba kumanje beneqembu eTurkey.
