IChiefs iqinisa imizamo yokuthola abeBafana
– Intatheli yeLisenethini
Njengoba iKaizer Chiefs isiashe omunye wabaqeqeshi abahlonishwayo ezwenikazi, manje sekubhekwe abadlali abasha abazosayinwa.
Nokho, kungase kuthathe amasonto ambalwa ngaphambi kokuthi leli qembu laseNaturena lenze izimemezelo ezinkulu zabadlali.
IChiefs, okuyiqembu elinabalandeli kunawo wonke eNingizimu Afrika, ithule cwaka ngabadlali abasha.
Lokhu kushiye abalandeli bayo belangazelela ukwaziswa ngabadlali abasha.
Ngokubika kweSoccerLaduma, zisaqhubeka izingxoxo ngabadlali ababili asebeqalile ukuzakhela igama eqenjini lesizwe iBafana Bafana.
Umbiko uveza ukuthi Amakhosi aphusha kanzima ukuthola u-Elias Mokwana ogijima kwiSekhukhune United no-Oswin Apolis wePolokwane City.
Kuvela ukuthi ikilabhu beyilinde ukufika komqeqeshi wayo omusha, uNasreddine Nabi, ngaphambi kokuvula izingxoxo ngokugcwele ngalaba badlali.
UNabi ujoyine iqembu ekhempini layo lokuziqeqeshela isizini entsha eTurkey ngempelasonto.
Umenyezelwe ngokusemthethweni njengomqeqeshi oyinhloko nethimba lakhe elizomlekelela kuleli sonto.
Njengoba uNabi esekhona futhi enemibono ezinqumweni zabadlali, kulindeleke ukuthi kulandele ukusayinwa kwabadlali abazoqinisa iqembu.
OLUNYE UDABA: Ezibuhlungu kwiPirates: Sekushone isikhulu sayo
Abalandeli beChiefs bakubheke ngabomvu ukumenyezelwa kwabadlali abasha eqenjini njengoba iqembu lizilungiselela isizini okubhekwe lukhulu kuyo.