Ezintsha

Ezintsha ngecala likaNurkovic neRoyal AM

IRoyal AM isilinde ngabomvu isinqumo seCourt of Arbitration for Sport (Cas) ecaleni layo eliqhubekayo eyalibekwa owayengumdlali wayo uSamir Nurkovic. 

Leli qembu laseMgungundlovu litholwe linecala lokuxosha lo mgadli ngendlela engafanele.

Lokhu kwakungemuva kokudedela lo mgadli odabuka eSerbia esahlale izinyanga ezintathu kuyo. 

UNurkovic, owake wagijima kwiKaizer Chiefs, uludlulisele kwiFifa udaba lwakhe, yafike yamvuna. 

IFifa ibe seyiyalela iRoyal AM ukuthi ikhokhele uNurkovic imali yakhe, okubikwa ukuthi ingaphezu kuka-R12 million. 

Nokho le kilabhu ephethwe ngusomabhizinisi waseThekwini, uShauwn “MaMkhize” Mkhize, ihlulekile ukukhokha le mali. 

Lokhu kuholele ekutheni iFifa ivale leli qembu amawindi amathathu okuhwebelana ngabadlali lingabhalisi mdlali.

Lokhu kube nomthelela omubi ekusebenzeni kweRoyal AM, kwacishe kwaholela ekutheni idliwe yizembe.

Ummeli weRoyal AM, uLeruma Thobejane, usidlulisele enkantolo lesi sinqumo seFifa, kanti kulindeleke ukuthi kuphume isinqumo ngoJulayi 15. 

UThobejane uzwakalise ukulethemba icala labo, enethemba lokuthi iCas izovuna bona.

Nokho uma iCas ingasivuma isinqumo seFifa esivuna uNurkovic, imiphumela ingaba mibi kakhulu kuThwihli Thwahla. 

Iqembu lingase libhekane nokuvinjelwa ukusayina abadlali kuze kube likhokha le mali. 

Manje njengoba kunezinsolo zokuthi imali ayisagelezi njengakuqala kwiRoyala AM, isimo singaba sibi kakhulu. 

Uma ingadliwa yicala, ihluleke wukukhokha le mali, akungabazeki ukuthi izembe lingagcina liyidlile.

Nokho iRoyal AM ihlalele ethembeni lokuthi isinqumo sizovuna yona ngesonto elizayo.