Ufake i-CV kwi-Arrows omunye wabagxalwe yiChiefs
– Intatheli yeLisenethini
Njengoba umsebenzi wokuqeqesha iGolden Arrows ungenamuntu kulandela ukushiya kukaSteve Komphela ngeledlule, leli qembu lithola inqwaba yama-CV kubaqeqeshi abahlukene.
UKomphela kudingeke ukuthi ashiye isikhundla sakhe ngokushesha ngemuva kokubizwa yiqembu lakhe, iMamelodi Sundowns, asesebenza kulo njengomqeqeshi omkhulu.
Ubebuyele kwi-Arrows maphakathi nesizini edlule, wayisusa ezembeni futhi kwashoda kancane ukuthi ayifake kwiTop 8, esala ngephuzu elilodwa nje vo.
Ubefike kuyo esuka kwiMoroka Swallows abeqale kuyo isizini futhi egila izimanga kwaze kwabe leli qembu lishidelwa yimali.
I-Arrows ikuqinisekisile kwiLisenethini ngempelasonto ukuthi ithungatha umqeqeshi onamava ozongena ezicathulweni zikaKomphela.
Imenenja yeqembu, uNonceba Madlala, iveze ukuthi uMabhuti Khenyeza noMusa Bilankulu bazobamba izintambo okwesikhashana ngesikhathi kusathungathwa umqeqeshi omusha.
Phakathi kwabaqeqeshi ababhekiwe kukhona obengumqeqeshi weKaizer Chiefs, uCavin Johnson ongomunye wabafake ama-CV abo.
UJohnson uza nesipiliyoni esiningi sokuqeqesha kwiPSL njengoba eseke waphatha emaqenjini angaphezu kwamathathu ngaphambi kweChiefs.
Nokho ufike wangabezana nezimbila zithutha, ziholwa emhlophe phambili kwiChiefs, wahamba umsila ungaphansi kwemilenze.
Irekhodi lakhe nokwazi iligi yakuleli kumenza abe ngomunye abanganikwa lesi sikhundla.
OLUNYE UDABA: Ezingena manje: Ivuke ngoxhaso oluhle iRichards Bay
Ngaphezu kwalokho, ngenxa yengcindezi encane neqembu elakhiwe ngabadlali abasebancane kwi-Arrows, uJohnson angavala isikhala sikaKomphela futhi akhele phezu kwesisekelo sesizini edlule.
