Sekulindwe uMokwena ngomsebenzi wakhe omusha
– Intatheli yeLisenethini
Kubukeka sengathi ikhefu obengumqeqeshi weMamelodi Sundowns, uRulani Mokwena, abelihlelile ngemuva kokukhululwa kwakhe kuleli qembu ngeke liphumelele.
Imibiko ikhomba ukuthi izinkunzi zaseMorocco, iWydad Athletic, zenza konke okusemandleni ukuthola uMokwena njengomqeqeshi wazo omusha.
UMokwena ukhululwe yiSundowns ngesonto elidlule kulandela imibiko yokungaboni ngaso linye nabaphathi nokuhluleka wukufeza abekubekelwe.
Manje kubukeka sengathi iWydad, engenye yezimbangi ezinkulu zeSundowns kwiCaf Champions League, izimisele ngampela ngokumthola.
Ngokwemibiko evela eMorocco, iWydad ibeke etafuleni inkontileka yeminyaka emithathu, kanti isinqumo sesilele kuyena uMokwena.
Iqembu kubikwa ukuthi selimise izingxoxo nabaqeqeshi abaningi abasezingeni eliphezulu ukuze ligxile ekutholeni uMokwena.
Lo mqeqeshi oneminyaka engu-37 uphinde waba namahlebezi okuthi uohlwini lelinye iqembu laseMorocco, i-AS FAR Rabat.
Bekubhekwe ukuthi angavala isikhala sikaNasreddine Nabi, oshiye leli qembu, wanquma ukuyobhekana nenselelo entsha nehlukile kwiKaizer Chiefs.
Lokhu kumfuna uthuli kweWydad kuveza ukuwethemba amakhono kaMokwena ukuthi angaliholela empumelelweni engcono leli qembu.
Uma uMokwena esamukela lesi sicelo, uzobe esengena ekubeni ngomunye wabaqeqeshi abanohlonzo ebholeni lamaqembu e-Afrika.
Umnyakazo olandelayo kaMokwena uzobhekwa ngabomvu kwazise isinqumo sakhe singaba nomthelela omkhulu kwiCaf Champions League.
OLUNYE UDABA: Kwenzekani ngabaqeqeshi bangesizini edlule kwiChiefs?
Ngenxa yesithunzi nobungcweti bakhe, ukuqokwa kukaMokwena kwiWydad kungase kuphawule isahluko esisha emsebenzini wakhe wokuqeqesha nakwiWydad.