EzintshaOrlando Pirates

Uzitholela ikhaya elisha ogajwe kwiPirates

Lo mdlali, oneminyaka engu-32, usehloliwe ngokwezempilo kwiSuperSport kanti manje usezoxoxisana nabaphathi ngemibandela yenkontileka. 

Uma egcina esayinile, uPule uzohinde ahlangane nomqeqeshi ake wasebenza naye phambilini uGavin Hunt.

Ukushiya kukaPule kulezi zinkunzi zaseSoweto kwaqinisekiswa ngemuva kweminyaka eyisithupha ekuzo. 

Ngokubika kweSABC Sport, AmaZulu nawo abezibhekile kulo mdlali kodwa kuyacaca ukuthi uPule unqume ukuhlala eGauteng. 

Kungenzeka ukuthi uhehwe wukuvuselela ubudlelwano bakhe bangaphambilini bokusebenzisana noHunt kwiBidvest Wits.

UPule ubengomunye wezethenjwa kwiPirates kodwa selokhu kwafika uJose Riveiro, izinto ziyamphika. 

Udlale imidlalo engu-146, washaya amagoli angu-23, okubalwa kuwo nawashaya emdlalweni womkhaya neKaizer Chiefs. 

Kulindeleke ukuthi maduze nje kumenyezelwe ukuthi uPule usesayinile kuleli qembu laseTshwane. 

Amava nekhono likaPule akungabazeki ukuthi kuzoba yigugu, ikakhulukazi njengoba iSuperSport kuthiwa isayine omunye umdlali osemnkantshubomvu, uKeagan Dolly. 

Uma laba badlali bengahlangana kahle, akungabazeki ukuthi iSuperSport ingaba elinye lamaqembu anzima ngesizini ezayo. 

Ukuya kukaPule kwiSuperSport akugcini nje ngokumhlanganisa noHunt kodwa kuphinde kumnikeze ithuba lokuthi aphinde adlale, azikhombise ukuthi akaphelile.