Ihambe nabafana abasebancane iPirates iya ekhempini
– Intatheli yeLisenethini
Abadlali ababili be-Orlando Pirates, uMohau Nkota noSiyabonga Dladla bahambe naleli qembu balibangisa eSpain ekhempini yalo yokulungiselela ukuqala kwesizini.
Lokhu kuwuphawu oluhle kubo bobabili laba badlali abasebancane njengoba belungiselela isizini yabo yokuqala neqembu elikhulu.
UMohau Nkota, oneminyaka engu-19, ukhushulelwe eqenjini elikhulu esuka kweleDStv Diski Challenge ngemuva.
Uchaze abaqeqeshi beqembu elikhulu ngethalente nokuzinikela kwakhe ngesikhathi ezicija nalo ngesizini edlule.
USiyabonga Dladla, ngakolunye uhlangothi, yena ulandwe kwiPele Pele FC, iqembu eliyinkulisa ye-Orlando Pirates elidlala kwi-ABC Motsepe League eGauteng.
Bobabili laba badlali banikezwe ithuba lokuzilolonga neqembu lokuqala ngesizini edlule.
Ukuzikhandla kwabo kuholele ekutheni babonakale sebekufanele ukungena eqenjiini elikhulu.
Manje sebesekhempini la bezocijwa kahle ukuze bajwayele indlela okwenziwa ngayo izinto neyokudlala ngaphansi kukaJose Riveiro.
Njengoba beziqeqesha nabadlali asebenamava, kuzobasiza ekuthuthukisweni kwabo ukuze bagcine bengabadlali abaqavile eqenjini elikhulu.
Omunye umdlali osemncane okuthiwa uhambe naleli qembu uThuso Moleleki ojoyine iPirates esuka kwi-Orbit College edlala kwiMotsepe Foundation Championship.
Kukule khempu yePirtaes la nomdlali okuphele isizini eseyisithandwa sabalandeli, uRelebohile Mofokeng afike wazifaka khona eqenjini eliqala imidlalo.
OLUNYE UDABA: Kungani kube uNasreddine Nabi? UJesicca uyachaza
Nalaba abathathu kuzomele balisebenzise ithuba lale khempu ukuthi bangene eqenjini eliqala imidlalo.