Uzobolekiswa owe-Pirates osalile iya ekhempini eSpain

– Intatheli yeLisenethini

Unozinti we-Orlando Pirates uSphamandla Gumede uzophinde abolekiswe nangesizini ezayo ukuze athole isikhathi sokudlala. 

Ngemuva kokuchitha isizini edlule ebolekiswe eqenjini elidlala kwiMotsepe Foundation Championship, i-Orbit College, uGumede ubuyele kwi-Orlando Pirates ekupheleni kwesizini.

Nokho kubukeka engekho ezinhlelweni zabaqeqeshi zesizini ezayo futhi kuvela ukuthi uzophinde abolekiswe. 

Lo mdlali, okhiqizwe yinkulisa yeSuperSport United ujoyine i-Orlando Pirates esuka kwiDondol Stars ekuqaleni kwesizini edlule.

Kodwa ube esebolekiswa futhi ngokwemibiko yakamuva, uGumede akazilolongi nePirates futhi ngeke ahambe nayo ukuya eSpain. 

IPirates ilibangise eSpain ngoMsombuluko ebusuku, kanti ngokwemithombo, uGumede ubengeyona ingxenye yethimba elihambile. 

Umthombo osondelene nalesi simo utshele i-iDiski Times ukuthi, “Lo nozinti wakudala weDondol Stars akazange azilolonge neqembu elikhulu.

“Futhi ngeke ahambe neqembu ukuya eSpain ohambweni lwangaphambi kwesizini.” 

Leli phephandaba liphinde labika ukuthi uGumede angase aphinde abolekiswe.

Kuthiwa iPirates imbhekela iqembu azodlala kulo kwiDStv Premiership noma iMotsepe Foundation Championship.

Njengoba kusathungathwa iqembu elifanelekile azobolekiswa kulo, ikusasa likaGumede lisalokhu lingaqondakali. 

OLUNYE UDABA: OweYanga uveza okusha ngafuna u-Aziz Ki

Kodwa-ke, okunye ukubolekiswa kungase kumnike isikhathi sokudlala esibalulekile nesipiliyoni esidingekayo ukuze athuthuke.