U-Erasmus usafisa ukuhlala kuleli, ufunwa phesheya
– Intatheli yeLisenethini
Obengumdlali we-Orlando Pirates, uKermit Erasmus, ufuna ukuhlala kuleli yize sekuvele ukuthi kunamaqembu aphesheya amfunayo.
U-Erasmus usanda kushiya kwiPirates ngemuva kwamasizini amabili ebuye isibili kuleli qembu laseSoweto.
Lo mdlali oneminyaka engu-33 wabuyela kwiBucs ngoSepthemba 2022 ngemuva kokushiya kwiMamelodi Sundowns.
Ubehlale iminyaka emibili kwiSundowns, futhi wanqoba izicoco ezimbili zeligi nesisodwa seMTN8.
U-Erasmus ube nesizini eyimpumelelo ka-2022/23 neka-2023/24 kwiPirates, enqoba izindebe ezine – ezimbili zeNedbank Cup nezimbili zeMTN8.
Ngesikhathi edlala kwiPirates, lo mgadli udlale imidlalo engu-35 washaya amagoli angu-10.
Kodwa-ke, isikhathi sakhe sokudlala sehle kakhulu ngesizini ka-2023/24, njengoba edlale imidlalo engu-11 kuphela.
Ngokubika kwe-iDiski Times, ikhempu ka-Erasmus ithole izicelo ezivela e-Australia, Asia, nakwiPSL ngalo mdlali.
Phezu kwalezi zinhlelo kodwa lo mgadli uzimisele ngokuhlala kwiPremier Soccer League.
U-Erasmus udlale emaqenjini ambalwa e-Europe, njengoba eke waba kwi-RC Lens ne-Stade Rennais eFrance.
Uke wadlala naseHollanda kwiFeyenoord, neVitoria Setubal yasePortugal.
OLUNYE UDABA: Isithathe igxathu elibi ekaRulani Mokwena noBerg kwiDowns
Yize enamava ebholeni lamazwe ngamazwe, ubukeka ezimisele ngokuqhubeka nomsebenzi wakhe eNingizimu Afrika.
