Usekhonjwa eGreece uJunior Mendieta ‘ongeneme’ kwiDowns
– Intatheli yeLisenethini
UJunior Mendieta, ojoyine iMamelodi Sundowns engumdlali ovelele ngesizini edlule, kungenzeka ukuthi usezolishiya leli qembu.
Ngokwemibiko yakamuva, uJunior Mendieta uzimisele ngokushiya iSundowns ngaphambi kwesizini ezayo.
Sekuvele ukuthi inhliziyo yakhe seyise-Europe, ikakhulukazi eGreece la okuneqemnbu okuthiwa liyamfisa.
Ngesizini edlule uJunior Mendieta ubefunwa uthuli yiSundowns, iKaizer Chiefs ne-Orlando Pirates.
Ekugcineni, iSundowns iyona eyanqoba lo mbango wokusayina lo mdlali wasesiswini odabuka e-Argentina, imthenga kwiStellenbosch FC.
Kubikwa ukuthi iSundowns ihlukane no-R12 million ngesikhathi imthenga kwiStellies ngesigatshana senkontileka yakhe ebesimvumela ukuba athengiswe uma kukhona iqembu elimfunayo.
Yize ukufika kwakhe eChloorkop kube nesasasa elikhulu, uJunior Mendieta ukuthole kunzima ukungena eqenjini eliqala imidlalo.
Enye yezinselelo abhekane nazo kube wukulimala nokuthi ke ufice iSundowns ivele inenqwaba yabadlali abahle kule ndawo adlala kuyo.
Ubanga ijezi noThemba Zwane, uNeo Maema, uSiphelele Mkhulise, noGaston Sirino phakathi kwabanye.
Yize kunjalo, ukwazile ukufaka isandla ekunqobeni kweSundowns iDStv Premiership nakwi-African Football League kwisizini yakhe yokuqala.
Ngesizini ka-2023/24, uMendieta udlale imidlalo engu-23 kuyo yonke imiqhudelwano, washaya amagoli amabili.
Wakhele ozakwabo amagoli amahlandla amathathu.
Engenelisekile yisikhathi esincane sokudlala, kubikwa ukuthi uzwakalise isifiso sokushiya phakathi nesizini.
Ngaleso sikhathi kuthiwa iSuperSport United neqembu lakhe lakudala, iStellenbosch FC, bebezimisele ukumthatha ngokumboleka.
Kodwa uhlale kuyo iSundowns kwaze kwaphela isizini yize isimo sakhe singazange sishintshe.
Manje, ngokubika kwe-Unplayable, uMendieta usezojoyina iqembu laseGreece, elidlala kwiSuper League, iVolos NFC.
OLUNYE UDABA: USouthgate ubengakhathazekile yize i-England beyisha nendlu
Yize kusazobonakala ukuthi le mibiko iyiqiniso yini, ukuhamba kukaMendieta kungase kuvulele iSundowns ithuba lokwenza imali enhle.
