Sikhipha ifayela lomqeqeshi omusha weSekhukhune
Esinyathelweni esincomekayo, i-Sekhukhune United iqoke ukuyofuna umqeqeshi ongaziwa ebholeni lakuleli, yaqeda ukuqagela ngalesi sikhundla.
I-Sekhukhune iqoke uPeter Hyaballa, oneminyaka engu-48, njengomqeqeshi wayo omusha.
Uvale isikhala sikaLehlonolo Seema osanda kuxoshwa yiSekhukhune United kulandela izinsolo zokungaziphathi kahle.
Kepha ngemuva kokuqokwa kwakhe, umbuzo osale cishe kuwo wonke umlandeli webhola kuleli ngothi: ungubani yena lo Hyaballa?
Hhayi-ke, khululeka, ithimba leLisenethini selwenze ucwaningo olufishane ngalo mqeqeshi ukuthola kahle umsuka nomlando wakhe.
UPeter Hyballa wazalwa ngoDisemba 5, 1975. Ungumqeqeshi webhola lezinyawo waseGermany kanti ifayela lakhe liveza ukuthi useqeqeshe ezindaweni ezehlukahlukene.
Muva nje, usebenze njengomqeqeshi oyinhloko kwi-NAC Breda edlala kwi-Eerste Division, eHolland.
Umsebenzi kaHyballa wokuqeqesha uhlanganisa amazwe amaningana, okuhlanganisa iGermany, iNamibia, i-Austria, iNetherlands, iPoland, iDenmark neSlovakia.
Ngaphambi kokudlulela ekuqeqesheni emaqenjini amakhulu, u-Hyballa washiya umaka wakhe emaqenjini entsha eGermany.
Uhole izikwati ze-U19 zamakilabhu avelele njenge-Arminia Bielefeld, VfL Wolfsburg, neBorussia Dortmund.
Ngo-2010, wathatha umsebenzi wakhe wokuqala eqenjini elikhulu kwi-Alemannia Aachen kwiBundesliga 2.
Kulandela ukusebenza kwakhe kwi-Aachen, uHyballa waphatha inkulisa yeRed Bull Salzburg, wadlulela kwiSturm Graz e-Austria la ahlale khona iminyaka emibili. Kusukela ngo-2014 kuya ku-2016, ubeyiphini lomqeqeshi wenkulisa kwiBayer Leverkusen.
Ulwazi lukaHyballa olubanzi lwamazwe ngamazwe nerekhodi eliqinisekisiwe lokusebenza nentsha, kumenza abe ngumqeqeshi osebenza ngezindlela eziningi futhi osemnkantshubomvu.
OLUNYE UDABA: Inkiyankiya ebhekene neSpain ngoLamine Yamal
Akubonakali ezoba nenkinga ngokujwayela indlela okudlalwa ngayo kuleli kanti iSekhukhune kubukeka ithole umqeqeshi osezingeni.
